დღეს საწვრთნელ ბაზა „ალგეთში“ წვრთნის (DRILL) სერჟანტის კურსის გამოშვების ცერემონიალი გაიმართა. ღონისძიებას “უფროს სერჟანტ ზაზა ფერაძის სახელობის საწყისი საბრძოლო მომზადების ცენტრის” მეთაური, ვიცე-პოლკოვნიკი ელგუჯა ბიბინიძე დაესწრო. მან ცამეტ კურსდამთავრებულს შესაბამისი სერტიფიკატები გადასცა და წარმატებები უსურვა.

სწავლება მიზნად მაღალკვალიფიციური, პროფესიონალი წვრთნის (DRILL) სერჟანტების მომზადებას ისახავს, რომლებიც შემდგომში საქართველოს შეიარაღებული ძალების რეკრუტთა პირად შემადგენლობას გაწვრთნიან. ტრენინგი ამერიკული "დრილსერჟანტის" კურსის ანალოგია და სამწყობრო და ფიზიკური მომზადების ჩატარების მეთოდიკას მოიცავს. კურსის მსვლელობისას მსმენელებმა ლექციის ჩატარების, სამწყობრო და ფიზიკური მომზადების მეთოდიკა, ასევე პრაქტიკული სროლების ჩატარების მეთოდიკა გაიარეს.

წვრთნის (DRILL) სერჟანტის კურსი 5 კვირის განმავლობაში კოჯორში, გიორგი ანწუხელიძის სახელობის სერჟანტთა მომზადების ცენტრში მიმდინარეობდა.