ცხინვალის ტერიტორიაზე არჩილ ტატუნაშვილის დაღუპვასთან დაკავშირებით, საპარლამენტო უმრავლესობა სპეციალური რეზოლუციის მიღებას გეგმავს. საპარლამენტო უმრავლესობის ლიდერის, არჩილ თალაკვაძის თქმით, რეზოლუციაში დაფიქსირებული იქნება მოთხოვნა საერთაშორისო გამოძიების ჩატარებასთან დაკავშირებით.

„მოხდა ადამიანის თავისუფლებისა და სიცოცხლის ხელყოფა. საპარლამენტო უმრავლესობა ვაპირებთ, რომ ინიცირება გავუკეთოთ არჩილ ტატუნაშვილის გარდაცვალებასთან დაკავშირებით სპეციალურ რეზოლუციას, სადაც საერთაშორისო გამოძიების ჩატარებას მოვითხოვთ. ვინაიდან, ყველა საერთაშორისო და ადგილობრივ ანგარიშში ნათლად ჩანს, რომ ოკუპირებულ ტერიტორიებზე ადამიანის უფლებათა დარღვევების რისკი და საფრთხეები არის მაღალი და დროა , საერთაშორისო საზოგადოებამ მეტი მობილიზება მოახდინოს ოკუპირებულ ტერიტორიებზე მონიტორინგის თვალსაზრისით. მოვითხოვთ ასევე რუსეთის ფედერაციისგან, რომ ტერიტორიაზე საერთაშორისო დამკვირვებლები დაუშვას.“ - განაცხადა თალაკვაძემ

შეგახსენებთ, 22 თებერვალს ოკუპირებული ცხინვალის წარმომადგენლებმა საქართველოს მოქალაქეები არჩილ ტატუნაშვილი,ლევან ქუტაშვილი და იოსებ პავლიაშვილი უკანონოდ დააკავეს. საინფორმაციო წყაროებში გავრცელებული ინფორმაციით, არჩილ ტატუნაშვილი 23 თებერვალს ოკუპირებულ ქალაქ ცხინვალის საავადმყოფოში გარდაიცვალა. გარდაცვალების მიზეზად ოსური მხარე გულის მწვავე უკმარისობას ასახელებს, თუმცა სავარაუდოდ არჩილ ტატუნაშვილი ციხეში მიყენებული დაზიანებებისგან გარდაიცვალა.