„ევროპული საქართველო“ ფაროსანასთან საბრძოლველად საგანგებო მდგომარეობის გამოცხადებას ითხოვს

პოლიტიკა - 12:16, 26 Feb, 2018

997

„ევროპული საქართველო“ ფაროსანასთან საბრძოლველად საგანგებო მდგომარეობის გამოცხადებას ითხოვს. ამის შესახებ პარტიის ერთ-ერთმა ლიდერმა გიგი უგულავამ დღეს ჩატარებულ ბრიფინგზე ისაუბრა.

მისი თქმით, მდგომარეობაა დასავლეთ საქართველოში იმდენად რთულია, საჭიროების შემთხვევაში, ხელისუფლებამ არმიის ჩართვაზეც უნდა იზრუნოს.

„ფაროსანასთან საბრძოლველად საგანგებო მდგომარეობის გამოცხადებაა საჭირო. გასულ წელს, ფაროსანამ დიდი ზიანი მიაყენა საქართველოს მოქალაქეებსა და ეკონომიკას, ხელისუფლების დაუგეგმავი და არასწორი ხედვის გამო, წელს სიტუაცია მხოლოდ გაუარესდება. სამეგრელო და იმერეთი შესაძლოა შიმშილის საფრთხის წინაშე დადგეს. საჭიროა მასშტაბური მობილიზება, მათ შორის საგანგებო მდგომარეობის გამოცხადება და დამატებითი რესურსების მობილიზება.

ფაროსანას გამო 2017 წელს მხოლოდ თხილის ექსპორტი 151 მილიონი ლარით შემცირდა. ფაროსანა ანადგურებს სიმინდსა და სოფლის მეურნეობის სხვა პროდუქტებს. დასავლეთ საქართველოში ის უკვე ეპიდემიურ ხასიათს ატარებს. ფაროსანა 2015 წლიდან არის საქართველოში, ამის შესახებ მთავრობამ იცოდა თუმცა მათ ქმედითი ნაბიჯები არ გადაუდგამთ. ტოტალური ომის გამოცხადების ნაცვლად, მათ მხოლოდ ფრაგმენტული ნაბიჯების გადადგმა დაიწყეს. ჯერ კიდევ შარშან შესაძლებელი იყო ფაროსანას ჩაკეტვა და დამარცხება სამეგრელოს რამდენიმე რაიონში. ქართული ოცნება არც წელს არ გვთავაზობს რამე ახალს. მალე საფრთხის წინაშე დადგება აღმოსავლეთი საქართველოც. . მოსახლეობას არ აქვს განცდა, რომ მთავრობას პრობლების მასშტაბები ესმის. მოქალაქეებს ლეგიტიმური შიში აქვთ ხელისუფლების მიერ ნაყიდი პრეპარატების მიმართაც, რადგან არავის უფიქრია მათი საკმარისად ინფორმირება. დღეს უკვე შეწამვლისთვის მოსამზადებელი ღონისძიებები დაგვიანებულია. ევროპული საქართველო გამოდის ინიციატივით ფაროსანასთან საბრძოლველად გამოცხადდეს საგანგებო მდგომარეობა. ფაროსანასთან ბრძოლას და დიდი ტერიტორიების შეწამვლას დასჭირდება ბევრი ადამიანი. საჭიროა სახელმწიფო სტრუქტურებში დასაქმებული ხალხისა და მოხალისეების მასობრივი მობილიზება. პირადად ჩვენი პარტია მზადაა აქტიურად ჩაერთოს ამ პროცესში. საჭიროების შემთხვევაში შესაძლოა არმიის ჩართვაც. გამოიყოს დამატებითი ფინანსური რესურსი, რადგან კატასტროფის მასშტაბებიდან გამომდინარე საჭიროა კომპენსაციებზე მუშაობა. ფაროსანასთან ბრძოლაზე სწრაფად დავამყაროთ კომუნიკაცია მეზობელ ქვეყნებთან, რადგან მის წინააღმდეგ ბრძოლა მათ ინტერესებშიცაა” - განაცხადა გიგი უგულავამ.