ლანჩხუთის გამგებელმა საკუთარი ოჯახის კუთვნილი ავტომობილები გამგეობას მიაქირავა და ბიუჯეტის ფულით საბურავებს ცვლიდა

პოლიტიკა - 12:15, 26 Feb, 2018

3386

სახელმწიფო აუდიტის დასკვნის მიხედვით, ლანჩხუთის ყოფილმა გამგებელმა საკუთარი ოჯახის კუთვნილი ავტომობილები გამგეობას მიაქირავა, შემდეგ კი ამ ავტომობილებით თავად სარგებლობდა.

„2015-2016 წლებში, ლანჩხუთის მუნიციპალიტეტი ბალანსზე რიცხული ავტოსატრანსპორტო საშუალებების გარდა, საკუთარი უფლებამოსილების განსახორციელებლად იყენებდა კერძო პირებისგან იჯარით აყვანილ ავტომობილებს. კერძოდ, მუნიციპალიტეტის გამგებელი სარგებლობს 2 ავტომობილით, რაზეც გაფორმებული არის საიჯარო ხელშეკრულებები. აქედან, ერთი ავტომობილი გამგებლის (ზაზა ურუშაძე) საკუთრებაა, ხოლო მეორე ხელშეკრულება გაფორმებულია მუნიციპალიტეტსა და ფ/პ ილია ურუშაძეს შორის . იჯარის პირობების მიხედვით, მუნიციპალიტეტი უზრუნველყოფს სატრანსპორტო საშუალების მოვლა- პატრონობის ხარჯებს. კანონმდებლობის თანახმად , თანამდებობის პირს უფლება არ აქვს ქონებრივი გარიგება დადოს იმ სახაზინო დაწესებულებასთან, რომელშიც მას თანამდებობა უჭირავს. შესაბამისად აღნიშნული საიჯარო ხელშეკრულებების გაფორმებით დარღვეულია მოქმედი კანონმდებლობის მოთხოვნები.“- აღნიშნულია აუდიტის დასკვნაში.

აუდიტის დასკვნის მიხედვით, გამგებელი საბიუჯეტო ფულით საკუთარ ავტომობილებზე ცვლიდა საბურავებს, ზეთს და ანტიფრიზს.

„აღსანიშნავია, რომ გამგებლის საკუთრებაში არსებული ავტომანქანა Volkswagen Passat-ის საწვავის გამოყენება არ ფიქსირდება 2016 წლის ივნისი-ოქტომბრის თვეებში, თუმცა ამავე პერიოდში ავტომანქანაზე გაწეულია სხვადასხვა სახის ხარჯი. კერძოდ, შეცვლილია საბურავები, გამოცვლილია ზეთი, ანტიფრიზი და სხვ. შესაბამისად, არსებობს რისკი იმისა, რომ მუნიციპალიტეტმა იჯარით აყვანილ სატრანსპორტო საშუალების ექსპლოატაციაზე ხარჯები გასწია ისე, რომ მისი გამოიყენება არ მომხდარა მუნიციპალიტეტის საჭიროებებისთვის შესაბამის პერიოდში.“- ნათქვამია დასკვნაში.