"ეს არის ყოვლად ამაზრზენი მკვლელობა" - პრეზიდენტმა არჩილ ტატუნაშვილის ოჯახს მიუსამძიმრა

პოლიტიკა - 13:13, 24 Feb, 2018

2167

საქართველოს პრეზიდენტი გიორგი მარგველაშვილი წილკანში ჩავიდა და ცხინვალში გარდაცვლილი არჩილ ტატუნაშვილის ოჯახს მიუსამძიმრა.

როგორც მარგველაშვილმა აღნიშნა, სახელმწიფო უშიშროების სამსახური მუშაობს, როგორც გადმოსვენების, ისე ორი ჩვენი თანამოქალაქის დაბრუნების საკითხზე.

„ჩვენ დავკარგეთ თანამებრძოლი, ადამიანი, რომელიც საქართველოს ემსახურებოდა. მათ შორის, საერთაშორისო მისიებში. მას საქართველოში ერთი ტყვია არ გაუსვრია.

ის ემსახურებოდა თავის სამშობლოს, სამსახურის მერე უკვე მშვიდობიანი მოქალაქის ცხოვრებით ცხოვრობდა.

ეს არის ყოვლად ამაზრზენი მკვლელობა, რომელიც დიდ ტკივილად ემატება ოკუპაციის ტრაგედიას.

სახელმწიფო უშიშროების სამსახური მუშაობს, როგორც გადმოსვენების, ისე ორი ჩვენი თანამოქალაქის დაბრუნების საკითხზე, რომელთა ბედი ჩვენ ძალიან გვაღელვებს.

ვიზიარებთ ოჯახისა და ყველა ახლობლის ტკივილს. ბუნებრივია, ჩვენთვის ძალიან მნიშვნელოვანია, რომ გამოჩნდეს ამ ტრაგედიის პარალელურად ის სიმართლე, რაც ხდება ოკუპირებულ რეგიონებში. ის, რაც ვნახეთ ერთი წლის წინ აფხაზეთში, ის რასაც ვხედავთ აქ, ეს არის უდანაშაულო ადამიანების მკვლელობა“, -განაცხადა ქვეყნის პირველმა პირმა.