“ქართულ ოცნებას” არ სურს, ხალხს ცხოვრება გაუიაფოს”

“ქართულ ოცნებას” არ სურს, ხალხს ცხოვრება გაუიაფოს” - ზურაბ ჭიაბერაშვილი

პოლიტიკა - 11:51, 24 Feb, 2018

871

ზურაბ ჭიაბერაშვილი “ქართული ოცნების” მიერ “ევროპული საქართველოს” მცირე დასაშუალო ბიზნესის მხარდაჭერის პროგრამის ჩაგდებას ეხმაურება და ამბობს: "მთავრობა ისევ ხალხის ხარჯზე აპირებს საკუთარი კეთილდღეობის ზრდას".

მისი თქმით, “ქართულ ოცნებას” რომ უარი არ ეთქვა:

- საწვავზე აქციზის განახევრებაზე, მოქალაქეებს გაუიაფდებოდათ ბენზინი, დიზელი და თხევადი გაზი, უფრო ძვირს არ გადაიხდიდნენ მგზავრობაში

- წლიურად 100,000 ლარამდე ბრუნვის მქონე ბიზნესის გადასახადებისგან მთლიანად გათავისუფლებაზე, შეღავათი მიეცემოდა ათასობით კვების ობიექტს, საშენი მასალების მცირე საამქროს, საცხობს, სილამაზის სალონს, მანქანის სახელოსნოს, სახერხსა თუ სხვა წვრილ საწარმოს

- საშემოსავლო გადასახადის დაწევაზე, თითოეულ დასაქმებულს ხელფასიდან მეტი დარჩებოდა ჯიბეში

- საფოსტო გზავნილებზე დაუბეგრავი 300-ლარიანი ლიმიტის 500 ლარამდე გაზრდაზე, ათასობით მოქალაქეს გაცილებით იაფი დაუჯდებოდა ინტერნეტით ნივთების გამოწერა

“იმიტომ, რომ არ უნდა, თავად მოიკლოს კეთილდღეობა, ხელისუფლება უარს ამბობს “ევროპული საქართველოს” მცირე და საშუალო ბიზნესის მხარდაჭერის პროგრამაზე, რომელიც ეკონომიკური ზრდის დაჩქარებაზე, უმუშევრობის შემცირებაზე, ფასების დასტაბილურებასა და მოქალაქეთა შემოსავლების ზრდაზეა ორიენტირებული”, - ამბობს ჭიაბერაშვილი.

მისი თქმით, “ევროპული საქართველო” კვლავ აპირებს პარლამენტში კანონპროექტების წარდგენას და აიძულებს ხელისუფლებას, გაატაროს ხალხის საკეთილდღეო კანონები.