"ოთხოზორიას შემთხვევაზე უარესი ამბავია... დამნაშავეები ჩვენ ვართ, ვინც ამათ ვიტანთ"- ცხინვალში ქართველი სამხედროს გარდაცვალებას ბიბილაშვილი ეხმაურება

პოლიტიკა - 15:19, 23 Feb, 2018

1218

ცხინვალის საავადმყოფოში საქართველოს მოქალაქის გარდაცვალების ფაქტს ერთიანი ნაციონალური მოძრაობის წევრი ზაზა ბიბილაშვილი ეხმაურება. ბიბილაშვილის შეფასებით აღნიშნული ფაქტი გიგა ოთხოზორიას შემთხვევაზე უარესი ამბავია.

“ცხინვალის საოკუპაციო რეჟიმმა მორიგი ქართველი, გ. ტატუნაშვილი მოკლა წამებით. "ოსური მედიის" ინფორმაციით, „გენოციდის ბრალდებით” დაკავებული საქართველოს მოქალაქე ცხინვალის "საავადმყოფოში გარდაიცვალა". აი, რას წერს მტერი:

„საკუთარ ბრალეულობაში დარწმუნების შემდეგ, ეჭვმიტანილმა უარი თქვა კითხვებზე გაეცა პასუხები ადვოკატისა და თარჯიმნის გარეშე, თუმცა არც მათი თანდასწრებით უთანამშრომლია გამოძიებასთან. ამის შემდეგ გადაწყდა მისი მოთავსება დროებითი დაკავების იზოლატორში, თუმცა გადაყვანისას მან ერთ-ერთი გამცილებლის იარაღის დაუფლება სცადა. აღნიშნული მცდელობა გამცილებლებმა ფიზიკური ძალისა და სპეციალური საშუალებების გამოყენებით აღკვეთეს. ტატუნაშვილმა წონასწორობა დაკარგა და კიბის საფეხურებზე დაეცა, რის შედეგადაც მიიღო ტრავმები და გადაიყვანეს საავადმყოფოში“.

გიგა ოთხოზორიას შემთხვევაზე უარესი ამბავია. მაგრამ მე არ ვადანაშაულებ ივანიშვილის რეჟიმს. რომ ვადანაშაულებდე, ის საქართველოს ინტერესების მატარებელ ხელისუფლებად უნდა მიმაჩნდეს და არა რუსული სპეცსამსახურების მიერ დასმულ მექრთამეებისა და მოღალატეების ტოქსიკურ ბუკეტად, რომელმაც ქართველების რეალურ გენოციდში ბრალდებული მარეკ დუდაევი პოლიტპატიმრად გაათავისუფლა ციხიდან.

დამნაშავეები ჩვენ ვართ, ვინც ამათ ვიტანთ. მათ შორის იმაში, რომ არ გვაქვს მათთვის დამსახურებული ადგილის მიჩენის შნო, დღესვე.”- წერს ზაზა ბიბილაშვილი.

შეგახსენებთ, გასულ ღამეს ოკუპირებული ცხინვალის საავადმყოფოში საქართველოს მოქალაქე 1983 წელს დაბადებული არჩილ ტატუნაშვილი გარდაიცვალა. ინფორმაციას ამის შესახებ ე.წ სამხრეთ ოსეთის უშიშროების კომიტეტი ავრცელებს. დე ფაქტო უწყების ცნობით ტატუნაშვილი ერთი დღით ადრე ახალგორში დააკავეს, ტატუნაშვილს დე ფაქტო საგამოძიებო უწყებამ „გენოციდის" ბრალდება წაუყენა. როგორც საოკუპაციო რეჟიმის მედია წერს, ტატუნაშვილი დაკითხვაზე ცხინვალში გადაიყვანეს, სადაც მას აჩვენეს მასალები, რომელიც მის 2008 წლის საბრძოლო მოქმედებებში მონაწილეობას ამტკიცებდა.

დეფაქტო ცხინვალი აღიარებს, რომ დროებით იზოლატორში გადაყვანისას ტატუნაშვილის წინააღმდეგ ძალა გამოიყენეს, რის გამოც მან მნიშვნელოვანი ტრამვები მიიღო და მიღებული დაზიანებების გამო საავადმყოფოში გარდაიცვალა.