იუსტიციის უმაღლესი საბჭო დღეს გადაწყვეტს დაინიშნება თუ არა 50 მოსამართლე უვადოდ

პოლიტიკა - 09:39, 22 Feb, 2018

1015

იუსტიციის უმაღლესი საბჭო დღეს გადაწყვეტს დაინიშნება თუ არა 50 მოსამართლე უვადოდ, მათ შორისაა ტელეკომპანია „რუსთავი 2“-ის საქმის მოსამართლე ნათია გუჯაბიძე. 50 კანდიდატიდან 13-მა პრეზიდენტის მიერ დანიშნულ საბჭოს არამოსამართლე წევრს, კრიტიკული განცხადებების გამო უნდობლობა გამოუცხადა და ანა დოლიძის აცილება მოითხოვა.

"ჩვენ დავნიშნავთ ადამიანებს, რომელთაც აქვთ მიღებული პოლიტიკური გადაწყვეტილებები, რომელთაც აქვთ მიღებული გადაწყვეტილებები, რომლებიც სერიოზულად ხელყოფდა ადამიანის უფლებებს. მაგალითად სერგო თეთრაძის საქმე, მაგალითად სულხან მოლაშვილის საქმე. ასეთი ადამიანები შემდეგ შესაძლებელია რომ ბოროტი სისტემის ბერკეტები დარჩნენ, მაგრამ დარჩნენ უვადოდ. ამიტომ, ან ჩვენ გავასუფთავებთ სისტემას და დავნიშნავთ ხალხს, რომელიც ამას ნამდვილად იმსახურებს, ან ჩვენს დავტოვებთ ძალიან სერიოზულ კითხვის ნიშნებს, რომლებიც ხელყოფს და კითხვის ნიშნის ქვეშ აყენებს ჩვენს მომავალს,"- აცხადებს ანა დოლიძე.

ანა დოლიძისგან განსხვავებული პოზიცია აქვს იუსტიციის საბჭოს წევრს, დიმიტრი გვრიტიშვილს:

"რაც შეეხება მოსაზრებას რომ გადაწყვეტილებები მიიღება წინასწარ შეთანხმებით ან კლანური პრინციპით, ეს არის იმ ცილისმწამებლური კამპანიის ნაწილი, რომელსაც ზოგი არამოსამართლე წევრი ახორციელებს,"-აცხადებს იუსტიციის საბჭოს წევრი, დიმიტრი გვრიტიშვილი.