ოკუპირებული აფხაზეთის ე.წ. საგარეო საქმეთა სამინიტრო, საქართველოს საგარეო საქმეთა მინისტრის, მიხეილ ჯანელიძის განცხადებას ეხმაურება, რომელშიც მინისტრი საქართველოს ხელისუფლების აფხაზებთან და ოსებთან შერიგების აქტიური პოლიტიკის გატარების სწრაფვაზე საუბრობს. ჯანელიძის თქმით, ოფიციალური სტრუქტურები უკვე მუშაობენ აღნიშნულ საკითხებზე.

"ამასთან დაკავშირებით, გვინდა შეგახსენოთ, რომ მრავალი წლის განმავლობაში, აფხაზური მხარის ძალისხმევა მიმართულია ორმხრივი კომპრომისის მისაღწევად, ქართულ-აფხაზურ კონფლიქტში დაძაბულობის განმუხტვისკენ და სრული, თანაბარუფლებიანი დიალოგისკენ.

გასული მეოთხედი საუკუნის განმავლობაში საქართველოს სხვადასხვა პოლიტიკური ძალის არაერთ წარმომადგენელს გაუკეთებია მრავალრიცხოვანი განცხადებები აფხაზეთთან და ოსეთთან მშვიდობიანი დარეგულირების პროცესის დაწყების სწრაფვასთან დაკავშირებით. პრაქტიკაში კი საქართველოს ხელისუფლება განაგრძობს რეგიონში შექმნილი პოლიტიკურ-სამართლებრივი ფაქტორების იგნორირებას და მტკიცე უარს აცხადებს უსაფრთხოების საერთაშორისო გარანტიების შესახებ შეთანხმების ხელმოწერაზე, რომელიც მხარეებს შორის სრულყოფილი დიალოგის აღსადგენად ძირითადი დოკუმენტი იქნებოდა.

იმედი ვიქონიოთ, რომ საქართველოს ახალი ხელისუფლება სწორ დასკვნებს გამოიტანს და რეალურ ნაბიჯებს გადადგამს, რომელიც ორ ქვეყანას შორის ნდობის აღდგენისკენ იქნება მიმართული, რაც აფხაზეთისა და აფხაზი ხალხის მიმართ საქართველოს მუდმივი აგრესიული პოლიტიკის გამო დაიკარგა.

ნდობის აღდგენის მიზნით კონკრეტული ღონისძიებების გასატარებლად , ქართულმა მხარემ, პირველ რიგში, უარი უნდა თქვას ჩვენი მოქალაქეების მიმართ პოლიტიკურ, ფინანსურ-ეკონომიკურ და ჰუმანიტარულ ზეწოლაზე და შეწყვიტოს ჩვენი რესპუბლიკის საერთაშორისო იზოლაციის უპერსპექტივო მცდელობები. სწორედ, ასეთი მიდგომა მოგვცემს საშუალებას ვისაუბროთ, საქართველოს მთავრობის გულწრფელ სურვილზე, შეიქმნას რეალური პირობები მხარეებს შორის ნდობის აღსადგენად.

გვინდა, იმედი ვიქონიოთ, რომ საქართველოს ხელისუფლების ამჟამინდელი წარმომადგენლები შეძლებენ პოლიტიკური ნება გამოიჩინონ და აფხაზურ მხარესთან წლების განმავლობაში დაგროვებული მრავალრიცხოვანი პრობლემების გადასაჭრელად შინაარსობრივი დიალოგი დაიწყონ” - ნათქვამია მარიონეტული რეჟიმის ე.წ. საგარეო უწყების განცხადებაში.