პარლამენტში სახელმწიფო დაზვერვის სამსახურის წარმომადგენლები მივლენ

პოლიტიკა - 11:21, 20 Feb, 2018

896

დღეს საქართველოს პარლამენტის თავდაცვისა და უშიშროების, საგარეო ურთიერთობათა და დიასპორის და კავკასიის საკითხთა კომიტეტების გაერთიანებული სხდომაზე სახელმწიფო დაზვერვის სამსახურის თანამშრომლებს მოუსმენენ. დეპუტატებს აინტერესებთ რას გეგმავს რუსეთის აგრესიის წინააღმდეგ დაზვერვის სამსახური, კანონმდებლებთან საუბარი ასევე შეეხება დაზვერვის სამსახურში მიმდინარე რეფორმებსა და საიდუმლო ინფორმაციას.

დაზვერვის სასმახურის მუშაობას აკრიტიკებს ერთიანი ნაციონალური მოძრაოის წევრი სალომე სამადაშვილი:

„ის რომ რუსეთ აძლიერებს საკუთარ პოზიციებს ანექსირებულ ტერიტორიებზე, ეს არის ერთ-ერთ მნიშვნელოვანი თემა. იმიტომ, რომ მათ შორის დაზვერვის სამსახურის მუშაობაც უნდა იყოს მიმართული იქითკენ, რომ ჩვენი ინტერესები უკეთ დავიცვათ. ასე რომ გარკვეულ წილად დიახ ვფიქრობ, რომ შექმნილი ვითარება რაც შეეხება ოკუპირებულ და ანექსირებულ ტერიტორიებს, არის ამ უწყების არც თუ ძალიან ეფექტიანი მუშაობის შედეგი. “-განაცხადა სალომე სამადაშვილმა.

პარლამენტის თავდაცვისა და უშიშროების კომიტეტის თავმჯდომარის ირაკლი სესიაშვილის თქმით ამ სფეროში სერიოზული პროგრესია და მნიშვნელოვანია რომ გატარებული რეფორმების შესახებ ინფორმაცია დეპუტატებსაც ჰქონდეთ.

„პირველ რიგში გვინდა გავეცნოთ იმ რეფორმებს, რომელიც გატარდა ამ უწყებაში და მართლაც შთამბეჭდავი რეფორმებია. გვაქვს ძალიან სერიოზული პროგრესი და მნიშვნელოვანია, რომ ეს იცოდნენ დეპუტატებმა. მისი განსაკუთრებული სპეციფიკიდან გამომდინარე ჩვენთვის ძალიან მნიშვნელოვანია, რომ ყოველთვიურად, ორ თვეში ერთხელ მოხდეს დეპუტატების ინფორმირებულობა. “-განაცხადა ირაკლი სესიაშვილმა.