მედია პრობლემები და კრიზისი სარეკლამო ბაზარზე - ნიკა გვარამია კახა ბექაურს სარეკლამო ბაზრის დანგრევის მცდელობაში ადანაშაულებს

პოლიტიკა - 18:19, 16 Feb, 2018

1383

სასტუმრო „ჰოლიდეი ინში“ მედიაორგანიზაციების წარმომადგენლებს შორის შეხვედრა დაპირისპირების რეჟიმში წარიმართა, თუმცა შეხვედრის მონაწილეები თანხმდებოდნენ იმაზე, რომ განსაკუთრებით რთული ვითარებაა სარეკლამო ბაზარზე და ამ ვითარებას კიდევ უფრო ართულებს ის მდგომარეობა, რომ მარეგულირებელი კომისია კვლავ არ ასაჯაროებს 2017 წლის სარეკლამო შემოსავლის შესახებ მონაცემებს. შეხვედრის მონაწილეები აღნიშნავდნენ იმას, რომ მარეგულირებელი კომისია იქცა მხარედ და ის ხელისუფლების დაკვეთებს ასრულებს.

„მაესტროს და იმედის გაერთიანება, ჰოლდინგი, ეს რა თქმა უნდა გემოვნების საკითხია და ასე შემდეგ, მაგრამ პირდაპირ უნდა ვთქვათ, რომ ეს არის უკანონო გაერთიანება, ორი მაუწყებლობა ერთი პირის ხელში, როგორც არ უნდა იყოს, ეს არის შენიღბული ტყუილი, ჰოლდინგი ერთი იურიდიული პირი იქნება სხვაგან, მეორე აქ თუ როგორც იქნება, ერთი ბენეფიციალი მფლობელის ხელში ორი სხვადასხვა მაუწყებლობა არის საქართველოს კანონმდებლობით დაუშვებელი.

მე გიდასტურებთ როგორც ყველაზე მსხვილი მედიის მენეჯერი, რომელიც საზრდოობს მხოლოდ და მხოლოდ სარეკლამო ბაზრის შემოსავლებით, სარეკლამო ბაზარი არის უმძიმეს მდგომარეობაში, ის არის უმძიმესად დაკლებული, მათ შორის სალარე მაჩვენებლითაც, ეს ნიშნავს იმას, რომ 1,7 კურსის პირობებში უფრო მეტი იყო ლარის მოცულობა სარეკლამო ბაზარზე, ვიდრე 2,5 კურსის პირობებში. მაშინ, როდესაც 40% არის სავალუტო შემოდინება დაახლოებით. ეს არის კატასტროფული კრიზისი და ეს არის მთლიანად სახელმწიფო კანონმდებლებისა და მარეგულირებელი კომისიის ერთობლივი ქმედებით გამოწვეული, პირველი თავიდათავი ამ ყველაფრის არის ბატონი ბექაური, რომელიც ყველაფერს აკეთებს საიმისოდ, რომ სარეკლამო ბაზარი დაინგრეს და ამის ამოცანა ძალიან მარტივია - ჰქონდეთ პრობლემები იმ მედიებს, რომლებიც საზრდოობენ სარეკლამო ბაზრით. აბა ტელეკომპანია „იმედს“ არანაირი პრობლემა ამით არ შეექმნება, 10-ის მაგივრად 20 მილიონი დოლარის ინვესტიციას მოახდენს მთავრობასთან დაახლოებული მენეჯმენტი“, - განაცხადა ნიკა გვარამიამ.