„პარლამენტის თავმჯდომარე დესტრუქციული პერსონაა, რომელიც დაკავებულ თანამდებობას არ შეეფერება“

„პარლამენტის თავმჯდომარე დესტრუქციული პერსონაა, რომელიც დაკავებულ თანამდებობას არ შეეფერება“ - ნინო ჯანგირაშვილი

პოლიტიკა - 14:39, 16 Feb, 2018

1013

საქართველოს პარლამენტის თავმჯდომარე მედიაორგანიზაციების წარმომადგენლებს ხვდება. შეხვედრის ფარგლებში დაპირისპირება მოხდა კობახიძესა და ტელეკომპანია „კავკასიის“ ხელმძღვანელს ნინო ჯანგირაშვილს შორის, რის შემდეგაც ჯანგირაშვილმა შეხვედრა დატოვა.

ჟურნალისტებთან საუბრისას ნინო ჯანგირაშვილმა განაცხადა, რომ პარლამენტის თავმჯდომარე არის დესტრუქციული პერსონა და დაკავებულ თანამდებობას არ შეეფერება:

„პარლამენტის თავმჯდომარემ სათქმელი არ მათქმევინა. საუბარი ორი წინადადების შემდეგ გამაწყვეტინა და აზრის დასრულების საშუალება არ მომცა. თავს შეურაცხყოფილად ვგრძნობ – კაცმა ათი-თხუთმეტი წუთი მეძახა, რომ ვატყუებ! სინამდვილეში ჩვენ მოვიტანეთ ციფრები, რომლითაც ვადასტურებთ, რომ პარლამენტის თავმჯდომარემ სარეკლამო ბაზართან დაკავშირებით წინა შეხვედრაზე არასწორი მონაცემები წარმოადგინა. მან თქვა, რომ სარეკლამო ბაზარი ბოლო წლებში იზრდებოდა. ჩვენ მოვიტანეთ მონაცემები, რომ ბაზარი 2014 წლიდან იკლებს, ხოლო მანამდე იყო მზარდი. ამაზე მეცა, გამაჩუმა, არ მალაპარაკა და თვითონვე თქვა, რომ ბაზარი 2013 წლამდე იყო მზარდი. ჩანს, რომ პარლამენტის თავმჯდომარე არის ამ კანონის ლობისტი. კენჭისყრის დროს დეპუტატებზე ახდენდა ზეწოლას, მან დეპუტატებს ჩატში ჩაუყარა მოწოდებები, რომ ხმა მიეცათ ამ კანონისათვის“, - განუცხადა ჟურნალისტებს ნინო ჯანგირაშვილმა.