„ახალგაზრდა იურისტთა ასოციაცია“ იმ მაღალი თანამდებობის პირთა სიას ითხოვს, რომელთა მიმართაც გამოძიება მიმდინარეობს. საუბარია ქონებრივ დეკლარაციაში გამოვლენილ დარღვევებსა და თანამდებობის პირთა მიერ შესაძლო ინფორმაციის დამალვაზე.

საი-მ შესაბამისი სარჩელი საქალაქო სასამართლოში დღეს შეიტანა.

არასამთავრობო ორგანიზაციაში აცხადებენ, რომ კონკრეტული თანამდებობის პირების შესახებ ინფორმაციის მიწოდების მოთხოვნით პროკურატურას მიმართეს, თუმცა პასუხი არ მიუღიათ.

,,ის ფაქტი, რომ თანამდებობის პირების შესახებ ინფორმაცია დახურულია, რა თქმა უნდა, პრობლემატურია. კონკრეტულად ამ ფაქტთან დაკავშირებითაც ვფიქრობთ, რომ ინფორმაციები უნდა იყოს ღია. რაც შეეხება დეკლარაციებსა და ანგარიშვალდებულებას, სწორედ ამიტომ ავსებენ თანამდებობის პირები დეკლარაციებს, რომ მათი საქმიანობა და ქონებრივი მდგომარეობა იყოს საჯარო“ - აცხადებს მარიამ გოგოსაშვილი.