„უგულავას დროს ასე იყო, წელსაც ასე გავაკეთებთ და მომავალ წელსაც ასე გაგრძელდება“ - საკრებულოს უმრავლესობა ძველი უბნების რეაბილიტაციაზე

პოლიტიკა - 12:34, 16 Feb, 2018

746

თბილისის საკრებულოს ქონების მართვისა და საფინანსო საბიუჯეტო კომისიის თავმჯდომარის ირაკლი ზარქუას თქმით, გუდიაშვილის მოედნის რეაბილიტაციასთან დაკავშირებით ოპოზიციას საზოგადოება შეცდომაში შეჰყავს. ზარქუას თქმით, ძველი უბნების რეაბილიტაციის დროს ხელშეკრულების გაფორმება წარსულშიც მხოლოდ ერთ კომპანიასთან ხდებოდა, რადგან ძველი უბანი სპეციფიური მიმართულებაა და შეუძლებელია, შერჩევაში მონაწილეობა ყველამ მიიღოს.

„ეს ოპოზიციის მცდელობაა, რომ შეცდომაში შეიყვანოს საზოგადოება იმიტომ, რომ ვინ, ვინ და მან კარგად იცის, რომ უგულავას დროს სწორედ ასე იყო. პლეხანოვის ძველი და ახალი ნაწილიც სწორედ ასე გაკეთდა, წელსაც ასე გავაკეთებთ და მომავალ წელსაც ასე გაგრძელდება . რატომ? იმიტომ რომ ძველი უბანი არის სპეციფიური მიმართულება და შეუძლებელია, რომ აქ ტენდერში ყველამ მიიღოს მონაწილეობა, ჩვეულებრივმა სამშენებლო კომპანიებმა. აქ მხოლოდ ის სამშენებლო კომპანიები ღებულობენ მონაწილეობას შერჩევაში, რომლებსაც აქვთ გამოცდილება.“- განაცხადა ზარქუამ.

შეგახსენებთ, გუდიაშვილის მოედნის რეაბილიტაციისთვის 2018 წლის ბიუჯეტში 16 მილიონი ლარია გამოყოფილი 2019-ში კი 34 მილიონი.