"გაზრდილი ბიუროკრატიული ხარჯები" - საკრებულოს ოპოზიციონერი დეპუტატები ხმაურიან სხდომას პროგნოზირებენ

პოლიტიკა - 09:59, 16 Feb, 2018

790

თბილისის საკრებულო ხმაურიანი სხდომისთვის ემზადება - დღეს დედაქალაქის ბიუჯეტის შესწორებული ვარიანტი უნდა დამტკიცდეს.

„ნაციონალურ მოძრაობა“ გაზრდილ ბიუროკრატიულ ხარჯებს აპროტესტებს.

„ეს ბიუჯეტი ემსახურება მხოლოდ და მხოლოდ ბიუროკრატიული ხარჯების გაზრდას, ფუფუნების ხარჯების გაზრდას, წარმომადგენლობითი ხარჯების გაზრდას, რაც არ ასახავს იმ ადამიანების ინტერესებს, რომლებმაც თუნდაც „ქართულ ოცნებას“ დაუჭირეს მხარი მხოლოდ იმიტომ, რომ მათი ინტერესების დამცველი იქნებოდა ეს პოლიტიკური გუნდი,“-განაცხადა ენმ-ს წევრმა მარიკა დათუკიშვილმა.

„ევროპული საქართველოში“ მიაჩნიათ, რომ ქალაქის მთავარი ფინანსური დოკუმენტი მთავარ მოთხოვნებს არ პასუხობს.

„აღნიშნული ბიუჯეტი მორგებულია ბიუროკრატებზე, ისევ იზრდება ფუფუნების საგნებზე გამოყოფილი თანხები. რა თქმა უნდა ჩვენ გვექნება ჩვენი შეკითხვები, ჩვენი მოსაზრებები და კარგი იქნება თუ „ქართული ოცნების“ ხელისუფლება ამას გაითვალისწინებს,“-აცხადებს „ევროპული საქართველოს“ წევრი დავით ჟღენტი.

დედაქალაქის ბიუჯეტის შესწორებულ ვარიანტს მხარს დაუჭერს მმართველი პარტია.

„2018 წლის თბილისის ბიუჯეტი დამატებით 34 მილიონი ლარით იზრდება, რაც მოხმარდება იმ პროგრამული პრიორიტეტების განხორციელებას, რაზეც ჩვენ საზოგადოებას წინასაარჩევნოდ ვესაუბრებოდით, როგორიც არის საზოგადოებრივი ტრანსპორტის განვითარება. აღნიშნული თანხით მოხდება 2018 წელსვე 100 ახალი ევროპული ტიპის ავტობუსის შეძენა,“-აცხადებს ”ქართული ოცნება - დემოკრატიული საქართველოს” წევრი ვახტანგ შაქარიშვილი.