GIPA-ს რექტორი უნივერსიტეტში მიმდინარე მოვლენების შესახებ განცხადებას ავრცელებს

პოლიტიკა - 18:53, 15 Feb, 2018

1667

საზოგადოებრივ საქმეთა ინსტიტუტის (GIPA) რექტორი, მაკა იოსელიანი საგანმანათლებლო პროგრამების აკრედიტაციასთან დაკავშირებით GIPA-ში მიმდინარე მოვლენების შესახებ განცხადებას ავრცელებს. „ნიუპოსტი“ განცხადებას უცვლელად გთავაზობთ.

”GIPA-ში მიმდინარე მოვლენები, რომლებიც საზოგადოების განხილვის მორიგ თემად იქცა გასული დღეების განმავლობაში, გახლავთ ღია დიალოგი GIPA-სა და განათლების იმ უწყებებს შორის, რომლებიც ხარისხის უზრუნველყოფასა და განვითარებას ემსახურებიან. შესაბამისად, ეს პროცესი გახლავთ დროული და მიზანშეწონილი.

ევროპული სტანდარტის აკრედიტაციის და ავტორიზაციის პროცესი, არის ის მიმართულება, რომელსაც GIPA სრულად უჭერს მხარს და მეტიც, GIPA თავისი არსებობის განმავლობაში, ამ სტანდარტის დამკვიდრებას და განვითარებას უწყობს ხელს. 90-იანი წლების დასაწყისში GIPA გახლდათ ის ინსტიტუცია, რომელმაც ქართულ საგანმანათლებლო სივრცეში პირველმა შემოიტანა დასავლური სწავლების ხარისხი და ღირებულებები.

დღევანდელი პროცესების ინიცრება მოხდა GIPA-ს მხრიდან იმ მიზნით, რომ თემა განვითარდეს და მოიცვას მთელი საგანმანათლებლო სივრცე. ჩვენი სურვილია, რომ დიალოგი გადავიდეს კონსტრუქციულ და შედეგზე ორინეტირებულ ფორმატში, რისთვისაც მოვუწოდებ ყველა დაინტერესებულ მხარეს თავი შეიკავოს არაკორექტული და ხშირ შემთხვევაში, არაზუსტი ინფორმაციის გავრცელებისგან. სამწუხაროა, რომ კონკრეტული ადამიანები ცდილობენ ზიანი მიაყენონ არა მარტო GIPA-ს, არამედ დიალოგის პროცესს.

ბატონ, დიმიტრი შაშკინს კი მისი განცხადების საპასუხოდ, მინდა შევახსენო, რომ მისი და მისი თანაგუნდელების მმართველობის დრო, GIPA-სთვის შევიწროვების და შეზღუდვის პერიოდთან ასოცირდება. სწორედ აღნიშნული შეზღუდვის შედეგად გადადგა 2006 წელს, უნივერსიტეტის მაშინდელი რექტორი, გიორგი მარგველაშვილი. რაც შეეხება პრეზიდენტის GIPA-ში დაბრუნებას, აღნიშნული არ შეესაბამება სიმართლეს და გამომდინარე ჩემი პირადი კომუნიკაციიდან, გარანტირებულად შემიძლია განვაცხადო, რომ ბატონი გიორგი უნივერსიტეტში დაბრუნებას არ გეგმავს.

ყველა სუბიექტი, ვინც ამ პროცესში ვმონაწილეობთ პირდაპირ თუ ირიბად, პირველ რიგში ვართ პასუხისმგებლები სტუდენტებისა და მათი ინტერესების წინაშე. კიდევ ერთხელ ვადასტურებთ, აკრედიტაცია/ავტორიზაციის პროცესის აუცილებლობას და მიგვაჩნია, რომ უკეთესი საგანმანათლებლო სივრცის შესაქმნელად უმნიშვნელოვანესია დემოკრატიული და სამართლიანი შეფასების სისტემის არსებობა, რომელიც ორიენტირებული იქნება განათლების ხარისხის გაუმჯობესებაზე და სტუდენტთა ინტერესების დაცვაზე.”- ნათქვამია განცხადებაში.

განათლების ხარისხის განვითარების ეროვნული ცენტრის საგანმანათლებლო პროგრამების აკრედიტაციის 16-კაციანმა საბჭომ „GIPA”-ს ახალ საბაკალავრო პროგრამას საჯარო მმართველობაში აკრედიტაციაზე უარი უთხრა. უნივერსიტეტმა გადაწყვეტილება გაასაჩივრა და ის ახლა აპელაციის საბჭოს გადაწყვეტილებას ელოდება.