ნინო ჯავახაძე და აშშ-ის ელჩის მოადგილე საზღვაო ოპერაციების ერთობლივი მართვის ცენტრის უწყბათშორისი საბჭოს წევრებს შეხვდნენ

პოლიტიკა - 17:27, 15 Feb, 2018

897

შინაგან საქმეთა მინისტრის მოადგილე ნინო ჯავახაძე და აშშ-ის ელჩის მოადგილე ელიზაბეთ რუდი საქართველოს აღმასრულებელი ხელისუფლების ორგანოების საზღვაო ოპერაციების ერთობლივი მართვის ცენტრის უწყბათშორისი საბჭოს წევრებს შეხვდნენ.

შეხვედრას შინაგან საქმეთა სამინისტროსს სასაზღვრო პოლიციის უფროსი, უწყებათშორისი საბჭოს ხელმძღვანელი თემურ კეკელიძე, აშშ-ის ექსპორტის კონტროლისა და საზღვრის უსაფრთხოების პროგრამის (EXBS) მრჩეველი მონიკა დორადო, გლობალურ საზღვაო საფრთხეებზე რეაგირების კოორდინაციის ცენტრის (GMCC) დირექტორის მოადგილე, ბრაიან უილსონი და სანაპირო დაცვის საერთაშორისო ურთიერთობების და საგარეო პოლიტიკის საკითხებში საქართველოს მიმართულების კურატორი, შუიტ ჰაბტემაიკლი დაესწრნენ.

შეხვედრაზე მხარეებმა საზღვაო ოპერაციების ერთობლივი მართვის ცენტრის მიმდინარე და დაგეგმილი პროექტები და ინფორმაციის გაცვლის წესის დოკუმენტი განიხილეს. აშშ-ის დელეგაციის წევრებმა დადებითად შეაფასეს საზღვაო ოპერაციების ერთობლივი მართვის ცენტრის საქმიანობა. აშშ-ის ელჩის მოადგილემ, ელიზაბეთ რუდმა აღნიშნა, რომ ცენტრი ამერიკისა და საქართველოს მჭიდრო თანამშრომლობის ძალიან კარგი მაგალითია. შს მინისტრის მოადგილემ, ნინო ჯავახაძემ აშშ-ის დელეგაციას ცენტრის განვითარებაში შეტანილი წვლილისა და სამომავლო პროექტების მხარდაჭერისათვის მადლობა გადაუხადა.

საზღვაო ოპერაციების ერთობლივი მართვის ცენტრი ამერიკის შეერთებული შტატების ექსპორტის კონტროლისა და საზღვრის უსაფრთხოების პროგრამის (EXBS) დაფინანსებითა და მხარდაჭერით შეიქმნა. ცენტრის უწყებათშორისი საბჭო ხელს წყობს მის საქმიანობას, უწყებათშორის თანამშრომლობას და საქართველოს ინტერესების დაცვას. უწყებათშორის საბჭოს, ასევე, მისი საქმიანობის ადმინისტრირებასა და ორგანიზაციულ-ტექნიკურ უზრუნველყოფას საქართველოს შინაგან საქმეთა სამინისტრო ახორციელებს.