"გამოძიება სუიციდს ვარაუდობს, რაც საეჭვოა" - ყელგამოჭრილი პატიმრის ოჯახი ობიექტურ გამოძიებას ითხოვს

შემთხვევა - 11:13, 14 Feb, 2018

1218

გლდანის #8 დაწესებულებაში ნაპოვნი ყელგამოჭრილი პატიმრის მდგომარეობა უკიდურესად მძიმეა.

არსებული ინფორმაციით, უგონო მდგომარეობაში მყოფი ნიკოლოზ ჩოფიკაშვილი, სასჯელაღსრულების დაწესებულების საპირფარეშოში თანასაკნელებმა იპოვეს. შემთხვევა 10 თბერვალს მოხდა.

დაჭრილის ოჯახი თვითმკვლელობის მცდელობას გამორიცხავს და მომხდარის ობიექტურ გამოძიებას მოითხოვს.

ღუდუშაურის კლინიკის ექიმებმა გუშინ ოჯახის წევრებს განუცხადეს, რომ შეწყვეტილია თავის ტვინის ფუნქციონირება, თირკმელებიც არის გათიშული, ამიტომ მისი გადარჩენის კუთხით მედიკოსები დამაიმედებსლ პროგოზსს ვერ აკეთებენ.

დაჭრილის ძმა, თეიმურაზ ჩოფიკაშვილი აცხადებს, რომ შემთხვევამდე რამენიმე დღით ადრე ბრალდებულს ესაუბრა, თუმცა მას რაიმე დაპირისპირების არსებობა არ უხსენებია.

"მდგომარეობა მძიმეა, გამოძიება ამბობს, რომ სუიციდის მცდელობააო, რასაც არ ვეთანხმებით, რადგან იარაღი ნაპოვნი არ არის. პარასკევს უნდა დაეწერა მოთხოვნა და შეხვედრა უნდა გვქონოდა. შაბათს მოხდა ეს ინციდენტი. ტელეფონით არაფერი უთქვამს თუ რამე უთანხმოება ჰქონდა,“- აცხადებს პატიმრის ძმა და ჯანდაცვის სამინისტროს მიმართავს, რათა ყველაფერი იქნას გაკეთებული უკიდურესად მძიმე მდგომარეობაში მყოფი პაციენტის გადასარჩენად.

როგორც მსჯავრდებულის ადვოკატი არჩილ ჩოფილკაშვილი "ნიუპოსტთან" აღნიშნავს, მიუხედავად იმისა, რომ სუიციდს ვარაუდობს გამოძიება, ადგილზე ვერ ნახეს ის საგანი, რითაც პატიმარი დაზიანებას მიიყენებდა.

"ეს თვითმკვლელობის ვერსიას ძალიან საეჭვოს ხდის... ვერ გეტყვით ჭრილობა რითი აქვს მიყენებული, გამოძიების ვერსიით, სავარაუდოდ, ცივი იარაღითაა მიყენებული“, - აცხადებს "კონსტიტუციის 42-ე მუხლის" სამეთვალყურეო საბჭოს თავმჯდომარე, ადვოკატი არჩილ ჩოფიკაშვილი.

გამოძიება სსკ-ის 115-ე მუხლით დაიწყო, რაც თვითმკვლელობამდე ან თვითმკვლელობის ცდამდე მიყვანას გულისხმობს.