„მიშა თავის თავს მიხედავს... ცუდი ისაა, რომ დრო გადის და უკრაინიდან არაფერი გამოდის“

„მიშა თავის თავს მიხედავს... ცუდი ისაა, რომ დრო გადის და უკრაინიდან არაფერი გამოდის“ - თორნიკე შარაშენიძე

პოლიტიკა - 13:02, 13 Feb, 2018

1885

კიევში, მიხეილ სააკაშვილის რესტორნიდან გატაცებასა და შემდეგ უკრაინიდან პოლონეთში დეპორტირებას ფეისბუქის გვერდზე აფასებს ექსპერტი საერთაშორისო საკითხებში თორინკე შარაშენიძე.

„ოდესღაც შევარდნაძემ ამერიკელებს უთხრა უკრაინას დაეხმარეთო. კარგად ესმოდა რომ რუსეთის განეიტრალების პოტენციალი პოსტ-საბჭოთა ქვეყნებიდან მხოლოდ უკრაინას ჰქონდა. უკრაინის გაძლიერება საქართველოზე რუსების გავლენის შესუსტებას ნიშნავდა.

ჩემთვის მიშას უკრაინაში ყოფნა პირველ რიგში ამით იყო საინტერესო. თუმცა, უკვე შარშან დიდი ეჭვი მეპარებოდა რომ უკრაინა გაძლიერდებოდა და თავის უზარმაზარ პოტენციალს თუნდაც სანახევროდ აამოქმედებდა. ბოლო წლებში კიევში რამდენჯერმე ვიყავი (ლექციებს ვკითხულობდი) და არაფერზე ეტყობოდა ამ ქვეყანას რომ ომში იყო ჩაბმული. არაფერზე. 2014 წელს ბჟეზინსკის იმედი მოეცა რომ რუსებთან ომში ბოლოსდაბოლოს დაიბადებოდა უკრაინული სახელმწიფო... მაგრამ ვერა.

გუშინ რაც მოხდა ეს ბევრს აღარაფერს ნიშნავს უკრაინისთვის. შეიძლება არც მიშასთვის. მიშა თავის თავს მიხედავს. ყველაზე ცუდი ისაა რომ დრო გადის და უკრაინიდან არაფერი გამოდის. დასავლეთსაც ოდესღაც ყელში ამოუვა ეს ქვეყანა და იტყვის: ამათ გამო ვეჩხუბეთ რუსეთსო?

45 მილიონიანი ქვეყანა აღმოსავლეთ ფრონტზე მაქსიმუმ ერთ რუსულ დივიზიას ვერ უმკლავდება. უზარმაზარი სამხედრო მრეწველობა აქვს და იარაღს ამერიკას თხოვს.

ნეტავ ვცდებოდე და ამ ქვეყანას ვინმემ ან რამემ უშველოს - მიშა უშველის თუ გრიშა, ეს ჩემთვის მესამერისხოვანია“ - წერს შარაშენიძე.