„საკასაციოს იმედი არ გვაქვს, რჩება ევროპის სასამართლო“ - დეკანოზის ადვოკატი სააპელაციოს გადაწყვეტილებაზე

პოლიტიკა - 12:27, 13 Feb, 2018

970

სააპელაციო სასამართლომ საქალაქო სასამართლოს გადაწყვეტილება ძალაში დატოვა და დეკანოზი გიორგი მამალაძე დამნაშავედ სცნო. დეკანოზის განაჩენი - 9 წლით თავისუფლების აღკვეთა, არ შეცვალა.

განაჩენზე კომენტარი გააკეთა დეკანოზის ადვოკატმა მიხეილ რამიშვილმა, რომელმაც აღნიშნა, რომ ბრძოლას ბოლომდე გააგრძელებენ და ევროპის სასამართლომდე მივლენ:

“ველოდებოდი და მაინც იმედი მქონდა რაიმე ცვლილების, მაგრამ თუ გავითვალისწინებთ, რომ 2017 წლის 10 თებერვლიდან ამ უკანონობის საწყისი დაიწყო საგამოძიებო ორგანოებმა, გააგრძელა პირველი ინსტანციის მოსამართლემ, იგივე კანონი და იგივე განაჩენი ძალაში დატოვა სააპელაციო სასამართლომ, ეს პირდაპირ მიუთითებს, რომ საქართველოში არ არსებობს მართლმსაჯულება, არც ერთი მოსამართლე არ არის დამოუკიდებელი ყველა არის დავალების შემსრულებელი, სირცხვილია, როდესაც მოსამართლეები არანაირ სიმართლეს და არანაირ შემადგენლობიდან გამომდინარე არ იაზრებენ თუ რა გადაწყვეტილებას ღებულობენ, ეს არის ნიშანი იმისა, რომ ჩვენთან აღარ არსებობს მართლმსაჯულება, მე შემიძლია ვთქვა, რომ ჩვენ ბოლომდე ვიბრძოლებთ, საკასაციო სასამართლოში შევიტანთ, საიდანაც არაფრის იმედი არ გვექნება, ერთადერთი იმედი რჩება ევროპის სასამართლო, როგორც ევროსასამართლოს ყველა გადაწყვეტილება, ეს გადაწყვეტილებაც იქნება მართლმსაჯულების ისტორიაში ერთი მუქი ფურცელი, ნიშანი იმისა, რომ მართლმსაჯულება არ არის საქართველოში. მე ძალიან ვწუხვარ, სიტყვიერად მქონდა იმედი, რომ მოსამართლეებს გონიერება ეყოფოდათ, მაგრამ მათ გონიერება არ გააჩნიათ, ისინი არიან დავალების შემსრულებლები, ფაქტი ფაქტად რჩება“, - განაცხადა მიხეილ რაიმიშვილმა.