"ჩემი შეთავაზება არანაირად არ აყენებს ეჭვქვეშ საქართველოს ტერიტორიულ მთლიანობას"- ლუკ კოფი NATO-ში გაწევრიანებაზე

პოლიტიკა - 18:19, 08 Feb, 2018

1427

დღეს, სასტუმრო “რუმსში” ამერიკული ფონდის Heritage-ის საგარეო პოლიტიკის ცენტრის დირექტორის, ლუკ კოფის მოხსენების „ნატოს წევრობა საქართველოსთვის: აშშ-ს და ევროპის ინტერესებში” პრეზენტაცია გაიმართა. მოხსნებაში შეიცავს რეკომენდაციას, რომ საქართველო დაჩქარებულად გახდეს NATO-ს წევრი და კოლექტიური თავდაცვის შესახებ მე-5 მუხლი დროებით არ გავრცელდეს ოკუპირებულ რეგიონებზე. კოფის თქმით, მისი რეკომენდაცია არანაირად არ აყენებს ეჭვის ქვეშ საქართველოს ტერიტორიულ მთლიანობას:

„ჩემი შეთავაზება არანაირად არ აყენებს ეჭვის ქვეშ საქართველოს ტერიტორიულ მთლიანობას. საქართველოს ხელისუფლებას ოკუპირებულ ტერიტორიებზე ძალის გამოუყენებლობის შესახებ გაცხადებული აქვს. ამიტომაც ვფიქრობ, რომ NATO-ში წევრობის საკითხი NATO-ს წესდების მე-5 მუხლით არ უნდა გავართულოთ. როგორც იცით, მე-5 მუხლი მოითხოვს უსაფრთხოების გარანტიებს ოკუპირებული ტერიტორიებისთვის. ის, რაც მე აღვნიშნე ჩემს ანგარიშში არის ის, რომ ერთ დღეს, როდესაც ოკუპაცია მშვიდობიანად დასრულდება, ცხინვალის რეგიონზე და აფხაზეთზე მე-5 მუხლის გარანტიები გავრცელდება. ეს იქნება ძალიან რეალისტური გადაწყვეტილება საქართველოსთვის, რომ შეუერთდეს NATO-ს. მინდა, ხაზი გავუსვა, რომ ეს უბრალოდ ჩემი შემოთავაზებაა. ბოლო 10 წელია, ბუქარესტის სამიტის შემდეგ მესმის ერთი და იგივე დისკუსია, როგორ გახდეს საქართველო NATO-ს წევრი. ათი წლის შემდეგ ვფიქრობ ახალი, უფრო კრეატიული მიდგომების დრო დადგა”.“- განაცხადა ლუკ კოფიმ.