უშიშროების საბჭოს მდივნის ყოფილი მოადგილე ლევან ბოძაშვილი საკუთარ ფეისბუკის გვერდზე ეხმაურება საქართველოს პრეზიდენტის ბ-ნი მარგველაშვილის განცხადებას უშიშროების საბჭოს გაუქმების შესახებ.

„უშიშროების საბჭოს გაუქმება იყო ისეთი პოლიტიკური აბსურდი, რომელსაც ვერც ერთი ქვეყნის სპეცსამსახური ვერ ინატრებდა, რომ ჩვენ თავს გავუკეთებდით“ - განაცხადა მარგველაშვილმა.

„ბ-ნო პრეზიდენტო, მთავარსარდალო, სახელმწიფოს მეთაურო!”- მიართავს ლევან ბოძაშვილი პრეზიდენტს.

„თუ ეს პოლიტიკური აბსურდი იყო, თქვენ რატომ დაუშვით, რომ ეს მომხდარიყო? სხვა რაიმე კონსტიტუციური ვალდებულება ამაზე უფრო მნიშვნელოვანი, რომ ქვეყნის უსაფრთხოება არ მორღვეულიყო, როგორც ბრძანებთ, გქონდათ კი? რატომ მოხდა, რომ საკონსტიტუციო კომისიაში სადაც არც ერთი უსაფრთხოების სპეციალისტი არ შეიყვანეს, არ მიაღებინეთ მონაწილეობა თქვენს სანდო და ერთგულ უშიშროების საბჭოს მდივანს, რომელიც ამ ყველაფერს იტყოდა ჯერ კიდევ მანამ ვიდრე თქვენ საბოლოოდ ოქტომბერში კონსტიტუციურ ცვლილებებზე ხელს მოაწერდით ზუსტად იმ მოტივით რომ ქვეყნის უსაფრთხოებას პრობლემა არ შექმნოდა? რატომ არ წარუდგინეთ ხელისუფლებას ჯერ კიდევ შარშან ზუსტად ამ დროს ორდონიანი უშიშროების საბჭოს მოდელი, რომლითაც მთავრობას საბჭოს მართვის თქვენს უფლებამოსილებებს ნაწილობრივ მაინც გადასცემდით, გაუქმდებოდა კრიზისების საბჭო, რითიც ინსტიტუციური წესრიგი აღდგებოდა და რომელიც კომპრომისული ვარიანტი იყო? აქედან სულ რომ არაფერი გამოსულიყო, თქვენ ხომ დღეს ასეთი საუბრის ყველანაირი უფლება გექნებოდათ?

პასუხი ამ ყველაფერზე ორია: ან კვალიფიკაცია არ გეყოთ და ვერ გაერკვიეთ თქვენს კონსტიტუციურ ვალდებულებებში, ან შეგნებულად გააკეთეთ, რათა დღეს ასეთი ვიწრო პოლიტიკური ხასიათის განცხადებების საშუალება მოგცემოდათ. შედეგი ორივე შემთხვევაში ერთია - დამდგარი პოლიტიკური აბსურდი და მორყეული უსაფრთხოების სისტემა, როგორც თქვენვე ბრძანებთ. და ვინ თუ არა თქვენ, მთავარსარდალი და სახელმწიფოს მეთაური, ყველაზე დიდი ლეგიტიმაციის მქონე პირი ქვეყანაში, არის ამ ყველაფერზე პასუხისმგებელი? თქვენ მართლა ფიქრობთ, რომ ხელისუფლების ან პოლიტიკური ჯგუფებისკენ ხელის გაშვერა თქვენს შეუსრულებელ ვალდებულებებს გადაფარავს?

პრეზიდენტობა არ არის ის მისია და თანამდებობა, რომელიც სხვისკენ ხელის გაშვერის საშუალებას იძლევა.“