ოზურგეთში მასწავლებელმა მოსწავლეს ჯერ სიტყვიერი შეურაცხყოფა მიაყენა შემდეგ კი ცემა

შემთხვევა - 15:57, 07 Feb, 2018

2195

ოზურგეთის მუნიციპალიტეტის სოფელ შრომის საჯარო სკოლის მასწავლებელმა მეშვიდეკლასელ მოსწავლეს სცემა. ფაქტი რამდენიმე დღის წინ მოხდა.

როგორც სკოლის დირექტორი, რუსუდან ცეცხლაძე "გურიის მოამბესთან" საუბრისას აღნიშნავს, მასწავლებელმა მეშვიდეკლასელი ბიჭს სკოლის კიბეზე ჯერ სიტყვიერი შეურაცხყოფა მიაყენა, შემდეგ კი ფიზიკური:

"ძალიან შეწუხებული ვარ. ეს ქალბატონი ამ დრომდე არასოდეს მსგავს ქმედებაში არ შეუმჩნევიათ. მათემატიკის მასწავლებელია და მეშვიდე კლასის დამრიგებელი. ბავშვიც არის ძალიან კარგი, გაწონასწორებული. წინა დღით ღონისძიება იყო სკოლაში. მეორე დღეს კი ეს ფაქტი მოხდა. პედაგოგთან საუბარი მინდოდა, საკლასო ოთახში რომ შევედი იქ დამხვდა ამ ბავშვის მშობლები. ვისაუბრეთ და მაშინვე დავიწყე საქმის მოკვლევა. საქმე გადაცემული მაქვს დისციპლინური კომიტეტისთვის, რომელიც სამი წევრისგან შედგება. აქედან, ერთ-ერთი მშობელი, შვილის ავადმყოფობის გამო თბილისში იმყოფება და როგორც კი დაბრუნდება, მაშინვე მოხდება გადაწყვეტილების მიღება.

მასწავლებელს ახსნა-განმარტების ბარათში უწერია, რომ არანაირი პრობლემა არა აქვს მოსწავლესთან და შეცდომა უნებლიეთ მოუვიდა.

სკოლის შინაგანაწესი პირდაპირ მკარნახობს, რომ მსგავსი შემთხვევის დროს მასწავლებელი სკოლიდან დავითხოვო, მაგრამ მე გვერდს ავუვლი დისციპლინური კომიტეტის გადაწყვეტილებას" - აცხადებს დირექტორი.

დატოვებს სკოლას თუ მიიღებს საყვედურს მათემატიკის მასწავლებელი, ამის თაობაზე გადაწყვეტილება დისციპლინურმა კომიტეტმა რამდენიმე დღეში უნდა მიიღოს.