„ჩვენი ქალაქი გადაიქცა სიკვდილის ქალაქად"- დეკანოიძე გუგეშაშვილის ოჯახზე თავდასხმას ეხმაურება

პოლიტიკა - 14:57, 07 Feb, 2018

1590

დოდო გუგეშაშვილის ოჯახზე განხორციელებულ თავდასხმას „ერთიანი ნაციონალური მოძრაობის“ წევრი ხატია დეკანოიძე გამოეხმაურა. დეკანოიძის თქმით, ეს ფაქტი კიდევ ერთხელ ადასტურებს იმას, რომ ქვეყანაში კრიმინალური სიტუაცია დღითიდღე უარესდება, ხელისუფლება კი კრიმინალთან ბრშოლაში შედეგს ვერ მიაღწევს, რადგან სწორედ მათი დახმარებით არიან ისინი ხელისუფლებაში და მათგან პოლიტიკური ავანსი აქვთ მიღებული:

„ჩვენი ქალაქი გადაიქცა სიკვდილის ქალაქად, სადაც კრიმინალი თარეშობს და სიტუაცია დღითიდღე უარესდება. ძალიან ბევრი საუბრობს მიზეზებზე, მიზეზი არის ერთი ძალიან მნიშვნელოვანი, ესაა 2012 წელს ქართული ოცნების მიერ კრიმინალური სამყაროსგან ძალიან დიდი პოლიტიკური ავანსის აღება. 2012 წლამდე თუ კრიმინალური სამყარო დაძაბუნებული იყო, 2012 წლის შემდეგ „ქართულმა ოცნებამ“ მათ უთხრა, რომ თქვენი დახმარებით მოვედით ხელისუფლებაში და ახლა ხელი შეგვიწყეთ ქუჩის და ციხეების დალაგებაში და არჩევნების გაკონტროლებაში.

2012 წლის შემდეგ ქართულმა ოცნებამ უთხრა პოლიციას, რომ მოიცადეთ ჩვენ კრიმინალური სამყაროსგან დახმარება გვჭირდებაო. არანაირი შედეგი ამ ხელისუფლებას არ ექნება, რადგან სწორედ ეს ხელისუფლება ცდილობს, რომ ყველა პოლიტიკური ნიშა გამოიყენოს კრიმინალური სამყაროს დახმარებით.“- განაცხადა ხატია დეკანოიძემ.