ათთვიანი პატიმრობის შემდეგ დრანდის ციხიდან პაატა როგავა გაათავისუფლეს

პოლიტიკა - 11:28, 07 Feb, 2018

1073

ათთვიანი პატიმრობის შემდეგ დე ფაქტო ხელისუფლების წარმომადგენლებმა დრანდის ციხიდან პაატა როგავა გაათავისუფლეს. გათავისუფლებული საკუთარ სახლში, ზუგდიდის სოფელ რიყეში იმყოფება. მისი ჯანმრთელობის მდგომარეობა დამაკმაყოფილებელია. პაატა როგავა გუშინ ენგურის ხიდით გადმოვიდა ოკუპირებული აფხაზეთიდან ზუგდიდში.

მამა-შვილი პაატა და არჩიკო როგავები ზუგდიდის მუნიციპალიტეტის სოფელ რიყის მკვიდრები არიან. მათი ოჯახის წევრების ცნობით, ისინი მდინარე ენგურის სანაპიროზე დე ფაქტო რესპუბლიკის მესაზღვრეებმა 2017 წლის 5 აპრილს დააკავეს, მაშინ როცა ცხენს ეძებდნენ.

სახელმწიფო უსაფრთხოების სამსახურში აცხადებენ, რომ დრანდის ციხიდან პაატა როგავას გათავისუფლება პოზიტიურ დინამიკას შესძენს გალის ინციდენტების პრევენციისა და მათზე რეაგირების მექანიზმის (IPRM) ფორმატის შემდგომ მუშაობას.

„2018 წლის 6 თებერვალს, ზუგდიდის რაიონის სოფელ რიყეს მკვიდრი პაატა როგავა დრანდის ე.წ. ციხიდან იქნა გათავისუფლებული. ეს უკანასკნელი 2017 წლის 5 აპრილს სოფელ რიყის მიმდებარედ არსებულ საოკუპაციო ხაზთან უკანონოდ დააკავეს ე.წ. საზღვრის კვეთის და რუსეთის საოკუპაციო ძალების წარმომადგენლებისთვის ფიზიკური წინააღმდეგობის გაწევის ბრალდებით.

დე ფაქტო ხელისუფლების გადაწყვეტილებით მას 2 წლით და 6 თვით ჰქონდა „მისჯილი“ პატიმრობა. სუს-ის წარმომადგენლების მიერ პაატა როგავას გათავისუფლების საკითხი დაკავების მომენტიდან დღემდე აქტიურად იყო დაყენებული გალის ინციდენტების პრევენციისა და მათზე რეაგირების მექანიზმის ჯგუფის შეხვედრების ფორმატში. პაატა როგავას გათავისუფლება პოზიტიურ დინამიკას შესძენს გალის ინციდენტების პრევენციისა და მათზე რეაგირების მექანიზმის (IPRM) ფორმატის შემდგომ მუშაობას“- ნათქვამია სუს-ის განცხადებაში.