ფოთის თეატრში ჭერი ჩამოინგრა

შემთხვევა - 18:20, 06 Feb, 2018

1707

ფოთის თეატრში ჭერის ნაწილი ჩამოინგრა და ფრაგმენტი ფოიეში ჩამოვარდა. ინციდენტი გვიან ღამით მოხდა და შემთხვევის შედეგად არავინ დაშავებულა.

შენობა 2014 წელს გაიხსნა, თუმცა სამ წელში უკვე მას რეაბილიტაცია სჭირდება. თეატრის ადმინისტრაცია ყველა სახის ღონისძიებების დროებით შეჩერებას ითხოვს.

„დღეს ფოთის თეატრის ფოეში კიდევ ჩამოვარდა ჭერის ფრაგმანტი! არის სხვა ადგილებიც, რომლებიც სავარაუდოდ ჩამოვარდება! ამიტომ მივიღეთ გადაწყვეტილება, შესაბამისი დოკუმენტაციის მომზადებისთანავე მივმართოთ კულტურისა და სპორტის სამინისტროს დაზიანებული უბნების შეკეთებამდე და შენობის უსაფრთხოების დადგენამდე შეჩერდეს ფოთის თეატრში სპექტაკლებისა და სხვა ღონისძიებების გამართვა. წინააღმდეგ შემთხვევაში ფოთის თეატრი იხსნის პასუხისმგებლობას მოსალოდნელ შედეგებზე.“- ნათქვამია ფოთის თეატრის მიერ სოციალურ ქსელში გავრცელებულ განცხადებაში.

ფოთის თეატრის დირექტორის თენგიზ სუხიას თქმით საბედნიეროდ ინციდენტი იმ დროს არ მოხდა, როდესაც ფოიეში მაყურებლები იყვნენ.

„სამუშაო საათებში რომ არ მოხდა გადავრჩით. თეატრი რა მდგომარეობაშია, ვიზუალურადაც ჩანს“- განაცხადა თენგიზ სუხიამ.

ფოთის მერის მოადგილის გიორგი ფარეშაშვილის თქმით, სამუშაოები თავის დროზე არაჯეროვნად ჩატარდა. მისი განცხადებით, ფოთის მერია ითანამშრომლებს კულტურის სამინისტროსთან რათა პრობლემები დროულად იქნას აღმოფხვრილი.

ფოთის თეატრის მშენებლობა 9 წლის განმავლობაში მიმდინარეობდა და 2014 წელს საზეიმო ვითარებაში გაიხსნა. მშენებლობა დაახლოებით 11 მილიონი ლარი დაჯდა.