"დეოკუპაცია საქართველოს ხელისუფლების ერთ-ერთი მთავარი პოლიტიკური ამოცანაა"- დიმიტრი ცქიტიშვილი

პოლიტიკა - 16:46, 06 Feb, 2018

1042

ოპოზიციის კრიტიკას იმასთან დაკავშირებით, რომ საქართველოს ხელისუფლება არასათანადოდ აპროტესტებს რუსეთისა და ოკუპირებული ტერიტორიების დე ფაქტო ხელისუფლებების სამხედრო თანამშრომლობას, მმართველი გუნდის წარმომადგენელმა დიმიტრი ცქიტიშვილმა უპასუხა. მისი თქმით დეოკუპაცია საქართველოს ხელისუფლების საგარეო პოლიტიკის ერთ-ერთი მთავარი ამოცანაა:

„დეოკუპაცია არის ერთ-ერთი მთავარი პოლიტიკური ამოცანა და ამ მიმართულებით, როგორც აღმასრულებელი, ასევე საკანონმდებლო ხელისუფლება ძალიან აქტიურად მუშაობს. ოპოზიციის მხრიდან კრიტიკა იქნება ყოველთვის რაც არ უნდა მოხდეს, რაც შეეხება ე.წ ხელშეკრულებების რატიფიცირებას, ნებისმიერი ე.წ სამართლებრივი აქტი, რომელიც გაფორმებულია რუსეთსა და ე.წ სამხრეთ ოსეთს შორის არ არის აღიარებული და არის ბათილი.“- განაცხადა დიმიტრი ცქიტიშვილმა.

შეგახსენებთ, რუსეთის პრეზიდენტმა ვლადიმირ პუტინმა, ოკუპირებულ ცხინვალსა და რუსეთს შორის გაფორმებული ე.წ. შეთანხმების რატიფიცირების შესახებ დოკუმენტს ხელი მოაწერა. ე.წ დოკუმენტი ოკუპირებული სამხრეთ ოსეთის ცალკეული სამხედრო შენაერთების, რუსეთის არმიის შემადგენლობაში შესვლას გულისხმობს.

„ევროპული საქართველოს“ ერთერთი ლიდერის ელენე ხოშტარიას თქმით, ისინი ვერ იღებენ საგარეო უწყებისგან პასუხს იმასთან დაკავშირებით, თუ რას უპირისპირებს რუსეთის საოკუპაციო ქმედებებს და რატომ არაა საქართველო სანქციებთან დაკავშირებით აქტიური.

“ერთიანი ნაციონალური მოძრაობის“ წევრის ნინო კალანდაძის შეფასებით საქართველოს ხელისუფლება უმოქმედობით მოსკოვთან თანამშრომლობს.