"რუსეთის ნაბიჯი სიახლე არაა, პრობლემა იმაშია, ჩვენ რას ვუპირისპირებთ"- ხოშტარია რუსეთისა და ცხინვალის რეგიონის ე.წ შეთანხმებაზე

პოლიტიკა - 16:38, 06 Feb, 2018

1240

ოკუპირებულ ცხინვალის რეგიონსა და რუსეთს შორის გაფორმებული ე.წ. შეთანხმების რატიფიცირების შესახებ დოკუმენტს რუსეთის პრეზიდენტმა ვლადიმირ პუტინმა ხელი მოაწერა. აღნიშნულ ფაქტს მწვავე გამოხმაურება მოჰყვა საქართველოში. ოპოზიცია საქართველოს საგარეო საქმეთა სამინისტროს უმოქმედობაში ადანაშაულებს. „ევროპული საქართველოს“ ერთერთი ლიდერის ელენე ხოშტარიას თქმით, ისინი ვერ იღებენ საგარეო უწყებისგან პასუხს იმასთან დაკავშირებით, თუ რატომ არაა საქართველო სანქციებთან დაკავშირებით აქტიური:

„რუსეთის ეს ნაბიჯი არ არის სამწუხაროდ სიახლე, ეს არის მოცემულობა რომელშიც ჩვენ ვცხოვრობთ, რომ რუსეთი მუდმივად ლახავს ტერიტორიულ მთლიანობას. აქ პრობლემა იმაშია, თუ რას ვუპირისპირებთ ჩვენ ამას. საგარეო საქმეთა სამინისტრო საუბრობს, რომ არანაირი კონკრეტული შემოთავაზება ჩვენ არ მიგვიღია, მაგალითად პოროშენკოსგან იმისთვის, რომ საქართველოს ოკუპაცია საერთაშორისო სანქციების ნაწილი გახდეს. ერთდერთი რაც რუსეთს გააჩერებს ეს არის სანქციები. რამდენი ხანია საგარეო საქმეთა მინისტრს ვეძახით რომ მოვიდეს უმცირესობასთან და გასცეს კითხვებს პასუხი, თუ რატომ არ ვართ აქტიურები ამ მიმართულებით.“- განაცხადა ელენე ხოშტარიამ.

შეგახსენებთ, რუსეთის პრეზიდენტმა ვლადიმირ პუტინმა, ოკუპირებულ ცხინვალსა და რუსეთს შორის გაფორმებული ე.წ. შეთანხმების რატიფიცირების შესახებ დოკუმენტს ხელი მოაწერა. ე.წ დოკუმენტი ოკუპირებული სამხრეთ ოსეთის ცალკეული სამხედრო შენაერთების, რუსეთის არმიის შემადგენლობაში შესვლას გულისხმობს.