,,მეტროსადგურში დაზარალებულებს კითხვები აქვთ მერიასთან და ამას ,,ოცნება“ შოუს ეძახის“

,,მეტროსადგურში დაზარალებულებს კითხვები აქვთ მერიასთან და ამას ,,ოცნება“ შოუს ეძახის“ - ხაბეიშვილი ,,ქართულ ოცნებას“ პასუხობს

პოლიტიკა - 13:30, 06 Feb, 2018

1260

ჩაშლილი რიგგარეშე სხდომა თბილისის საკრებულოში - სხდომის ფარგლებში განხილული უნდა ყოფილიყო მეტროსადგურ „ვარკეთილში“ ჭერის ჩამოშლისა და დაზარალებულთა მკურნალობის ხარჯების ანაზღაურების საკითხი. სხდომა ჩაიშალა, „ქართული ოცნება“ კი აცხადებს, რომ „ნაციონალური მოძრაობა“ შოუს მოწყობას ცდილობდა.

„ქართულ ოცნებას“ „ნიუპოსტთან“ საუბრისას ენმ-ის წევრი ლევან ხაბეიშვილი პასუხობს:

„ესენი არიან ადამიანები, რომლებიც საკუთარი აზრით კი არ მოქმედებენ, მესიჯბოქსებს მეილზე უგზავნიან და შემდეგ ამ მესიჯბოქსით საუბრობენ ხოლმე. როდესაც ოპოზიციას აქვს კითხვები, ისინი ამას ეძახიან შოუს, წარმოდგენას და ასე შემდეგ. ანუ ის პოლიტიკური პასუხისმგებლობა, რაც აქვთ და ისინი არიან მმართველი პარტია, ამას ვერ ითავისებენ, რაც არ უნდა არაადექვატური კითხვა ჰქონდეს ოპოზიციას, ხელისუფლება ვალდებულია ოპოზიციასთან დაჯდეს, ყველა იმ საკითხზე ისაუბროს, რაც თბილისელებს აწუხებთ. ჩვენ გვქონდა კონკრეტული კითხვა და ამ სხდომაზე არ იყვნენ წარმოდგენილნი მხოლოდ ნაციონალური მოძრაობის წარმომადგენლები, ამ სხდომაზე წარმოდგენილნი იყვნენ დაზარალებული ადამიანებიც. სულ 14 ადამიანი დაზარალდა მეტროსადგურ „ვარკეთილში“ მომხდარი ინციდენტის შედეგად, ამ ადამიანების უმრავლესობა ჩივის, რომ დედაქალაქის მერია ყურადღებას არ აქცევს. ეს „ნაციონალური მოძრაობის“ განცხადება არ არის, ეს არის იმ ადამიანების განცხადება, რომლებიც ესწრებოდნენ სხდომას და თავად მოუყვნენ იმ პრობლემის შესახებ, რაც აქვთ მერიასთან კომუნიკაციის დროს. ამ დროს ასეთი არაადექვატური განცხადება, რომ თურმე ვინმე შოუს მოწყობას აპირებს, გადახედონ მეილებს, იქნებ განუახლონ მესიჯბოქსი“, - აღნიშნავს ლევან ხაბეიშვილი.