საკრებულოს ჩაშლილი სხდომა - ვახტანგ შაქარიშვილი ენმ-ს შოუს მოწყობის მცდელობაში ადანაშაულებს

პოლიტიკა - 12:38, 06 Feb, 2018

1072

„ვარკეთილის“ მეტროსადგურში მომხდარ ინციდენტთან დაკავშირებით ენმ-ს მიერ საკრებულოს რიგგარეშე სხდომის მოწვევის საკითხს თბილისის საკრებულოს ფრაქციის „ქართული ოცნება – დემოკრატიული საქართველო“ თავმჯდომარის მოადგილე ვახტანგ შაქარიშვილი გამოეხმაურა. შაქარიშვილის თქმით, მმართველ გუნდს ნაციონალური მოძრაობის მიერ მოწყობილ წარმოდგენაში მონაწილოებისთვის არ სცალია. როგორც უმრავლესობის წევრი აცხადებს, ვისაც მეტროსადგურ „ვარკეთილში“ მომხდარ შემთხვევასთან დაკავშირებით კითხვები ჰქონდა პასუხების მიღება ორი კომისიის გაერთინებულ სხდომაზე შეეძლო, რომელსაც ენმ არ დაესწრო.

„კომისიების გაერთიანებულ სხდომაზე ძალიან მწვავე კითხვები დავსვით. ამ განხილვაში „ევროპულმა საქართველომ“ მიიღო მონაწილეობა. მათ ქონდათ საშუალება, კითხვები დაესვათ და მერიის მაღალჩინოსნებმა, შესაბამისი სამსახურების ხელმძღვანელებმა, ასევე თბილისის ვიცე-მერმა ამ კითხვებს პასუხები გასცეს.“ – განაცხადა ვახტანგ შაქარიშვილმა.

შეგახსენებთ, თბილისის საკრებულოს რიგგარეშე სხდომა, რომელიც ფრაქცია „ნაციონალური მოძრაობის“ ინიციატივით ჩაინიშნა, ქვორუმის უქონლობის გამო ჩაიშალა. სხდომაზე არც თბილისი მთავრობის და არც საკრებულოს უმრავლესობა არ მივიდა. თუმცა ნაციონალური მოძრაობის წევრები სხდიომას მაინც დაესწრნენ. რეგისტრაციის გავლისას დარბაზში მხოლოდ შვიდი დეპუტატი იყო და კვორუმი არ არსებობდა, თუმცა ოპოზიციონერმა დეპუტატებმა სხდომაზე მისულ ორ დაზარალებულს საშუალება მისცეს მათი პრობლემების შესახებ ესაუბრათ.