პარლამენტი საგაზაფხულო სესიისთვის ემზადება

პოლიტიკა - 09:26, 06 Feb, 2018

950

დღეს პარლამენტის საგაზაფხულო სესია იხსნება. პარლამენტის რიგით მეორე საგაზაფხულო სესია ბიუროს სხდომით გაიხსნება.

7-9 თებერვალს კი პლენარული სხდომები გაიმართება.

დეპუტატებს საგაზაფხულო სესიაზე რამდენიმე მნიშვნელოვანი გადაწყვეტილების მიღება მოუწევთ, რომელთა შორისაა რეზერვის რეფორმა, საპენსიო რეფორმა, ნარკოპოლიტიკის ლიბერალიზაცია, მიწის საკუთრების საკითხი, რეგლამენტში დაგეგმილი ცვლილებები.

ცნობილია, რომ საქართველოს პრეზიდენტი ყოველწლიური მოხსენებით საკანონმდებლო ორგანოში, პირველივე სხდომაზე არ მივა.

საზოგადოებრივი მაუწყებლის კანონპროექტის შესახებ კი, გიორგი მარგველაშვილის შენიშვნებს დეპუტატები მომდევნო სასესიო კვირაში განიხილავენ. წინასწარ ცნობილია, რომ „ქართული ოცნება“ ვეტოს დასაძლევად ემზადება.

„ამ სესიაზე ჩვენ არ გვექნება ვეტოს განხილვა, მომდევნო სესიაზე ვაპირებთ და არ გვექნება არც პრეზიდენტის ყოველწლიური ანგარიში. როგორც ცნობილია, წესით უნდა იხსნებოდეს საგაზაფხულო სესია პრეზიდენტის მოხსენებით, თუმცა ჩვენ ველოდებით თავად პრეზიდენტის ადმინისტრაციისგან თარიღების შესახებ მათ ინიციატივას,“ - განაცხადა ფრაქცია ”ქართული ოცნების” წევრმა თამარ ჩუგოშვილმა.

საგაზაფხულო სესია თებერვლის პირველ სამშაბათს იხსნება და ივნისის ბოლო პარასკევს იხურება.