პანკისის სპეცოპერაციის შედეგად გარდაცვლილი თემირლან მაჩალიკაშილის მამის თქმით მთავარ პროკურორთან შეხვედრისას კონკრეტული პასუხები ვერ მიიღო. როგორც მალხაზ მაჩალიკაშვილმა ”პალიტრანიუსის” გადაცემა ”360 გრადუსის” ეთერში განახცხადა, ის ფიქრობს, რომ მას საბოლოოდ შვილის სიმართლის დამტკიცება სტრასბურგის სასამართლოში მოუწევს. მალხაზ მაჩალიკაშვილი შვილის სიმართლეში დარწმუნებულია და აცხადებს, რომ მის სახლში არა სპეცოპერაცია, არამედ ტერორისტული აქტი ჩატარდა:

„მე ვითხოვ რომ დაესაჯათ პირველი თანამდებობის პირიდან, იმ პირამდე ვინც მოახდინა გასროლა და ჩაიდინა ეს სისასტიკე, მე ყოველთვის ვიძახი, რომ ჩემთან სპეცოპერაცია კი არ ჩაატარეს, ტერაქტი ჩატარდა. მე და ჩემი ოჯახი 3 საათის განმავლობაში მძველად ვიყავით აყვანილი, მეორე სართულზე კი 19 წლის შვილი მომიკლეს.

მე ვითხოვდი ასევე, რომ ადვოკატებს ქონოდათ ყველა მასალებზე წვდომა. ჩვენ გვაქვს წვდომა ნაწილობრივად. ასევე დაზარალებულის სტატუსიც.

ასე თუ ისე მე არანაირი კონკრეტული პასუხი ვერ მივიღე მაგრამ იმედს ვიტოვებ.

ყველაფერს გავაკეთებ იმისთვის, მთელ ჩემს ძალას და ღონეს მოვიხმარ იმისთვის, რომ თემირლანის სიმართლე დადგინდეს. რამდენადაც შევძლებ, მოვითხოვ თანამდებობის პირებთან შეხვედრასაც. ჩემი საბოლოო ბრძოლა ალბათ იმაზე გაჩერდება, რომ ევროპულ სასამართლოზე გავიტანო თემირლანის საქმე.“- განაცხადა მალხაზ მაჩალიკაშვილმა.