"პრეზიდენტის განცხადება სპეკულაციურია, მარგველაშვილი სააკაშვილის მხარდაჭერას და უდანაშაულობის მტკიცებას ვერ გაამართლებს"- მდინარაძე

პოლიტიკა - 17:08, 02 Feb, 2018

930

ფრაქცია ”ქართული ოცნების” თავმჯდომარე საქართველოს პრეზიდენტის კიდევ ერთხელ უპირისპირდება და ამბობს, რომ "მარგველაშვილის ბრიფინგი მიხეილ სააკაშვილის მხარდაჭერას და უდანაშაულობის მტკიცებას ვერ გაამართლებს".

მმართველი პოლიტიკური პარტია გიორგი მარგველაშვილს საქართველოს მესამე პრეზიდენტის "მხარდაჭერისთვის" ისევ აკრიტიკებს.

მამუკა მდინარაძე პრეზიდენტის დღევანდელი განცხადების იმ ნაწილსაც აფასებს, სადაც ქვეყნის პირველი პირი ამბობს, რომ "წინა ხელისუფლების დროს, სისტემური დანაშაულის მონაწილე პირების სისტემიდან დათხოვნა რეალური ამოსავალია“.

მდინარაძე ამ საკითხის კომენტირებისას აღნიშნავს, რომ "წინა ხელისუფლების დროს სისტემურ დანაშაულში მონაწილე პირები, 80-ზე მეტი ადამიანი იხდის სასჯელს და ძალიან ბევრ საქმეზე გამოძიება დღემდე გრძელდება".

"წინა ხელისუფლების დროს სისტემურ დანაშაულში მონაწილე პირები (80-ზე მეტი ადამიანი) იხდიან სასჯელს და გამოძიება დღემდე გრძელდება. რაც შეეხება გირგვლიანის სამეს, როგორც ცნობილია ცხრა მაღალი თანამდებობის პირია მიცემული პასუხისგებაში. არათუ სამსახურიდან დათხოვნა, არამედ დანაშაულის დადასტურების შემთხვევაში სახელმწიფო შეუვალი იქნება ასეთ დანაშაულში მონაწილე ნებისმიერი პირის მიმართ, ამიტომ განცხადება გამოძიებაში დახმარებაზე, პრეზიდენტის მხრიდან არის სპეკულაციური. ის ცდილობს აქცენტი სხვა საკითხებზე გადაიტანოს და დაავიწყოს საზოგადოებას, რომ ბოლო პერიოდის განმავლობაში აქტიურად უჭერდა მხარს მიხეილ სააკაშვილს და მასთან ერთად ამტკიცებდა სააკაშვილის უდანაშაულობას”, - თქვა თემის კომენტირებისას მდინარაძემ.