თბილისის მერის მოადგილე მაია ბითაძე ბოლო დღეების განმავლობაში, მერიის შესაბამისი სამსახურების მიერ თბილისის ზოგიერთ უბანში გარკვეული შესაწამლი ნივთიერების მოყრის შესახებ გავრცელებულ ინფორმაციას სიცრუეს უწოდებს.

როგორც მერის მოადგილე განმარტავს, თბილისის მუნიციპალიტეტის დაქვემდებარებაში მყოფი არცერთი სამსახური მსგავს ღონისძიებას არ ახორციელებს, რადგან ეს მათ კომპეტენციაში არ შედის.

რაც შეეხება საგაზაფხულო საქმიანობას, რომელიც ხე-მცენარეების მოვლას უკავშირდება, მაია ბითაძის განცხადებით, მსგავსი ტიპის საქმიანობა ჯერ დაწყებული არ არის, მით უფრო, რომ საერთოდ არ გამოიყენება ნივთიერებები, რომელმაც შეიძლება ცოცხალი არსებების მოწამვლა გამოიწვიოს.

„თბილისის მერია ყველა იმ ადამიანის აქტივობას მიესალმება, რომელიც ქალაქის განვითარებისა და არსებული პრობლემების მოგვარების საკითხშია ჩართული. ჩვენ ძალიან ღია ვართ და მივესალმებით ნებისმიერ მსგავს აქტივობას, თუმცა, ხაზგასმით გვინდა აღვნიშნოთ, რომ მერიის დაქვემდებარებაში მყოფი არცერთი სამსახური მსგავს საქმიანობას არ ახორციელებს და იმ შემთხვევაში, თუ ცხოველების დახოცვის ფაქტები კვლავ დაფიქსირდა, ნებისმიერ მსურველსა და დაინტერესებულ პირს აქვს უფლება - მერიის ცხელ ხაზს მიმართოს და ჩვენი კომპეტენციის ფარგლებში, შესაბამის რეაგირებას მოვახდენთ“, - განაცხადა მაია ბითაძემ.

მისივე თქმით, თბილისის მერიის მიერ „თბილსერვის ჯგუფის“ შესაბამისი ბრიგადები გამოიკითხა და არსებული ინფორმაციით, დედაქალაქის ქუჩებში ცხოველების დახოცვის არცერთი ფაქტი არ დაფიქსირებულა.

„ჩვენ ასევე, გაგებით ვეკიდებით იმ ადამიანების მიერ მოწოდებულ ინფორმაციას, რომელთა ცხოველებიც დაიხოცნენ. როგორც ვიცი, უბნების მიხედვით, დაახლოებით, ორ-სამ-ოთხ ფაქტთან არის დაკავშირებით გაკეთებული განცხადება, რის შესახებაც, ვფიქრობთ, რომ ექსპერტების დასკვნას უნდა დაველოდოთ. ამასთან, ძალიან მინდა თითოეულ ადამიანს ვთხოვო, რომ თავი შეიკავოს დეზინფორმაციის გავრცელებისგან“, - აღნიშნა თბილისის მერის მოადგილემ.

მისივე განმარტებით, ცხოველების მასობრივი დაცემის შესახებ გავრცელებული ინფორმაციის დადასტურების შემთხვევაში, დედაქალაქის მერია შესაბამის რეაგირებას მოახდენს.