ე.წ სამხრეთ ოსეთი რუსეთ-საქართველოს სატრანზიტო დერეფანთან დაკავშირებით მოლაპარაკებებში ჩართვას ითხოვს

პოლიტიკა - 15:59, 02 Feb, 2018

1971

საბაჟო ადმინისტრირების მექანიზმების ძირითადი პრინციპებისა და სავაჭრო მონიტორინგის შესახებ რუსეთ-საქართველოს შეთანხმებას ოკუპირებული ცხინვალის რეგიონის ე.წ საგარეო საქმეთა სამინისტრო ეხმაურება:

დე ფაქტო უწყების თქმით, სამხრეთ ოსეთის რესპუბლიკა არ წარმოადგენს ორმხრივი მოლაპარაკების მხარეს და მასზე რაიმე ვალდებულება არ აქვს.

„რუსეთის ფედერაცია და საქართველო ორმხრივ ფორმატში განიხილავენ პრაქტიკულ ნაბიჯებს ამ შეთანხმების იმპლემენტაციასთან დაკავშირებით, რომელიც ითვალისწინებს რუსეთსა და საქართველოს შორის დამატებითი ტრანზიტული დერეფნების შექმნას, ამ შეთანხმების პირველი დანართის შესაბამისად, დაგეგმილია ერთი ასეთი დერეფნის სამხრეთ ოსეთის რესპუბლიკის ტერიტორიაზე განთავსება.“

ე.წ უწყებაში ხაზგასმით აღნიშნავენ, რომ სამხრეთ ოსეთი არ წარმოადგენს ორმხრივი მოლაპარაკების მონაწილე მხარეს და მასზე არანაირი პასუხისმგებლობა არ აკისრია, რომელიც საშუალებას მისცემდა თავის სუვერენულ ტერიტორიაზე სხვა ქვეყნებს შორის ტრანზიტული დერეფნის განთავსებას.

„ამ შეთანხმების დებულებების პრაქტიკული რეალიზაციის შესაძლებლობა, რომელიც გავლენას ახდენს სამხრეთ ოსეთის ინტერესებზე, ეკონომიკის, უსაფრთხოებასა და ეკოლოგიასთან დაკავშირებით, დამოკიდებულია სატრანსპორტო დერეფნის გახსნით დაინტერესებულ აქტორებსა და რესპუბლიკის ხელისუფლებას შორის პირდაპირ მოლაპარაკებაზე“- ნათქვამია დე ფაქტო საგარეო უწყების განცხადებაში.

მათ ასევე ყურადღება გაამახვილეს იმაზე, რომ ამ პროექტში შემდგომი თანაბარუფლებიანი თანამშრომლობისთვის აუცილებელია შეიქმნას სამართლებრივი ბაზა, ამავე დროს როგორც ე.წ სამინისტროს განცხადებაშია აღნიშნული ამ საკითხის გადაწყვეტის სხვა ნებისმიერი გზას, მათ შორის პოლიტიკური ან ეკონომიკური ზეწოლის მცდელობას, პერსპექტივა არ აქვს.