ოკუპირებულ აფხაზეთში მდებარე რუსული სამხედრო შენაერთი 2018 წელს 600 წვრთნის ჩატარებას გეგმავს

პოლიტიკა - 13:23, 01 Feb, 2018

2175

ოკუპირებულ აფხაზეთში მდებარე რუსეთის სამხრეთის სამხედრო ოლქის შენაერთი, სამხედრო მომზადების ფარგლებში მიმდინარე წელს 600-მდე ტაქტიკურ წვრთნასა და სწავლებას ჩაატარებს. ამის შესახებ ჟურნალისტებს რუსეთის სამხრეთის სამხედრო ოლქის პრესსამსახურის უფროსმა ვადიმ ასტაფიევმა განუცხადა.

ასტაფაევის თქმით სწავლების საფუძველი იქნება, სამხედრომოსამსახურეების მიერ სტანდარტული იარაღისა და სამხედრო ტექნიკიდან საბრძოლო სროლის განხორციელება. გამოყენებული იქნება ჯავშანტრანსპორტიორი БТР-82А, ახალი ტანკები Т-72Б3, ზალპური ცეცხლის სარაკეტო სისტემები "Град" და საზენიტო სარაკეტო კომპლექსები "Оса-АКМ" და "Стрела-10"

საბრძოლო სროლების ნახევარი ღამით ჩატარდება.

სასწავლო-საბრძოლო ღონისძიებები მთის, ტყის, სანაპიროს და ველის პირობებში ჩატარდება- ამისთვის შერჩეულია „ნაგვალოუს“ და“ცაბალის“ პოლიგონები აფხაზეთში, „კაპუსტინ იარი“ და „აშულუკი“ ასტრახანის ოლქში და „მოლკინო“ კრასნოდარის მხარეში.

ბაზის ყოველი სამხედრომოსამსახურე 2018 წელს საშუალოდ საველე პირობებში 3 თვეს გაატარებს, საერთო ჯანში ორგანიზებული იქნება 40-ზე მეტი საველე გასვლა, თითოეულის ხანგრძლივობ 14 დღიდან 2 თვემდე იქნება.

საბრძოლო მომზადების ტაქტიკური ღონისძიებებში მონაწილეობას მიიღებს ბაზის სხვადასხვა ქვედანაყოფის ათასობით სამხედრო მოსამსახურე და 500-ზე მეტი სამხედრო ტექნიკა.