კავკასიის კვლევითი რესურსების ცენტრი კვლევის შედეგებს ასაჯაროებს. CRRC-საქართველო-ს მიერ გამოკითხული მოქალაქეების 41% ნატო-ში გაწევრიანებას უჭერს მხარს. ევროკავშირში - 45%, ევრაზიულ კავშირში კი 19%.

გამოკითხულთა 41% ამბობს, რომ მხარს უჭერს საქართველოს ნატო-ში გაწევრიანებას, 26% ნაწილობრივ უჭერს მხარს, ნაწილობრივ არა, 20% კი საქართველოს ნატო-ში გაწევრიანების წინააღმდეგია.

რაც შეეხება ევროკავშირს, ორგანიზაციაში გაწევრიანებას მხარს უჭერს გამოკითხულთა 45%, ნაწილობრივ მხარს უჭერს, ნაწილობრივ - არა 28%, ხოლო 14% წინააღმდეგია.

ევრაზიულ კავშირში გაწევრიანებას გამოკითხულთა 19% მხარს უჭერს მხარს. 24% ნაწილობრივ უჭერსმხარს ნაწილობრივ - არა, 38% კი საქართველოს ევრაზიულ კავშირში გაწევრიანების წინააღმდეგია.

კავკასიის ბარომეტრის გამოკითხვას საქართველოში CRRC-საქართველო, ნიუ იორკის კარნეგის კორპორაციის გრანტის ფარგლებში ატარებს. გამოკითხვის შედეგები წარმომადგენლობითია საქართველოს მასშტაბით. კავკასიის ბარომეტრი რეგიონული პროექტია - გამოკითხვა საქართველოში, სომხეთსა და აზერბაიჯანში ერთნაირი მეთოდოლოგიით ტარდება და მონაცემების შედარების საშუალებას იძლევა. აღნიშნული გამოკითხვა საქართველოში 2008 წლიდან ყოველწლიურად და 2013 წლიდან ორ წელიწადში ერთხელ ტარდება.

კვლევის საველე სამუშაოები 2017 წლის 23 სექტემბრიდან 10 ოქტომბრამდე პერიოდში ჩატარდა და 2 379 რესპონდენტი გამოიკითხა. კვლევაში საშუალო ცდომილების ზღვარი 2%-ია.