"ყოფილი პრეზიდენტის გამართლების პროცესის ერთ-ერთ ფლაგმანად ამჟამინდელი პრეზიდენტი გვევლინება"

"ყოფილი პრეზიდენტის გამართლების პროცესის ერთ-ერთ ფლაგმანად ამჟამინდელი პრეზიდენტი გვევლინება" - წულუკიანი

პოლიტიკა - 20:13, 29 Jan, 2018

1504

საკანონმდებლო პაკეტს, რომელსაც „ქართული ოცნება“ ამზადებს და რომელსაც სიმბოლურად „გირგვლიანის შესწორებები“ ეწოდება, იუსტიციის მინისტრი გამოეხმაურა. თეა წულუკიანის თქმით ამგვარი ინიციატივები ქვეყნის სწორ განვითარებას შეუწყობს ხელს და მისი უწყება ინიციატივის შემუშავებაში და დახვეწაში აუცილებლად მიიღებს მონაწილეობას:

„ვფიქრობ, ამგვარი ინიციატივები ქვეყნის სწორად განვითარებას შეუწყობს ხელს. აუცილებლად მივიღებთ მონაწილეობას ამ ინიციატივის დახვეწისა თუ შემუშავების მომდევნო პროცესში, რათა მომავალმა ხელისუფლებებმა არასდროს იფიქრონ, რომ სახელმწიფო მანქანის გამოყენება შესაძლებელია მართლმსაჯულების ხელშეშლის მიზნით“, – განაცხადა თეა წულუკიანმა.

წულუკიანმა გირგვლიანის საქმესთან მიმართებაში სააკაშვილზეც ისაუბრა და განაცხადა რომ სხვადასხვა პოლიტიკოსები გირგვლიანის საქმის გაუბრალოებას და სააკაშვილის გამართლებას ცდილობენ, ამის ერთ-ერთ ფლაგმანად კი წულუკიანმა საქართველოს მოქმედი პრეზიდენტი დაასახელა:

„საპარლამენტო უმრავლესობის ინიციატივა საინტერესოა, რომელსაც ჩვენ ყურადღებას დავუთმობთ, რათა მომავალში არ განმეორდეს ის, რასაც ახლა ვესწრებით. კერძოდ, მომსწრენი ვართ იმისა, რომ ხშირად ცდილობენ გირგვლიანის საქმის გაუბრალოებას. თუ ერთი მხრივ, გასაკვირი არ არის, რომ თავად სააკაშვილმა გირგვლიანის საქმეს პოლიტიკური ცირკი უწოდა, რა თქმა უნდა, გასაკვირი და მიუღებელია, რომ სხვა პოლიტიკოსებიც ცდილობენ საქართველოს ყოფილი პრეზიდენტის გამართლებას. გამართლების პროცესის ერთ-ერთ ფლაგმანად სწორედ საქართველოს ამჟამინდელი პრეზიდენტი გვევლინება.“ - განაცხადა წულუკიანმა