მეტროსადგურ „თავისუფლების მოედნის“ მოსაცდელ დარბაზში ორი პირის დაკავების ფაქტს საქართელოს სახალხო დამცველი ნინო ლომჯარია ეხმაურება. ომბუდსმენის თქმით, სამართალდამცავების მხრიდან უფლებამოსილების გადამეტების ფაქტები ხშირად ხდება.

ლომჯარიას განცხადებით, მისი აპარატი ამ საკითხის პრობლემატურობაზე ხშირად საუბრობს. ომბუდსმენის წარმომადგენელმა დაკავებული ორივე პირი წუხლ მოინახულა, ერთ-ერთ დაკავებულს დაზიანებები აღენიშნება და აცხადებს, რომ ეს დაზიანებები დაკავების დროს მიადგა.

პირების დაკავება ორი მუხლის საფუძველზე მოხდა, მათ ბრალი წვრილმანი ხულიგნობისა და პოლიციის მიმართ დაუმორჩილებლობის გამო წარედგინათ.

„ამ საკითხს შევისწავლით. მომხდარს ვუყურებთ არა ინდივიდუალურ ჭრილში, არამედ სისტემურად, რადგან დაკავების დროს ამ ტიპის მუხლების გამოყენებით ხშირად ხდება სამართალდამცავთა მხრიდან უფლებამოსილების გადამეტების ფაქტები. გამოძიებას მივადევნებთ თვალყურს", - განაცხადა ნინო ლომჯარიამ.