ევგენი ვოიცეხოვსკიმ და პაველ სტოცკომ ერთსქესიანი ქორწინება გააფორმეს 2018 წლის 4 იანვარს კოპენჰაგენში, სადაც ასეთი ქორწინება ლეგალიზებულია, ხოლო ამის შემდეგ მოსკოვში ფედერალურ საიმიგრაციო სამსახურში მათ პასპორტებში ოჯახური მდგომარეობის გვერდზე ქორწინების ოფიციალურად დამადასტურებელი ბეჭდები ჩაურტყა, რაც რუსეთში პირველი ერთსქესიანი ოჯახის ლეგალურად აღიარების ფაქტად იქცა.

თუმცა, რუსეთის ხელისუფლება გონს მოეგო და საკუთარი "შეცდომის" გამოსწორება დაიწყო. ამ საკითხთან დაკავშრებით, მოსკოვის პოლიციამ აღძრა ადმინისტრაციული სამართალდარღვევის საქმე, "მოქალაქის პირადობის დამადასტურებელი დოკუმენტის განძრახ დაზიანების, ან გაუფრთხილებლობით დაკარგვის გამო". მათ ამ სამართალდარღვევის გამო ფულადი ჯარიმა დაეკისრებათ. ამავე დროს, რუსეთის შსს-ს სპიკერმა ირინა ვოლკმა განაცხადა, რომ სტოცკოს და ვოიცეხოვსკის პასპორტები ძალადაკარგულადაა ჩათვლილი.

"ჩვენ არაფერი გაგვიფუჭებია და დაგვიზიანებია. მივიტანეთ ჩვენი პასპორტები ფედერალურ საიმიგრაციო სამსახურში და იქ შტამპი დასვეს. ვერ ვხვდებით რატომ არის ეს სამართალდარღვევა. ჩვენ ახლა ბინაში ვართ ჩაკეტილები. უცნობი პირები საბუთების წარმოდგენის გარეშე ჩვენს სახლში შემოსვლას ცდილობენ. პოლიციაში დავრეკეთ და არ მოდიან," - აცხადებს წყვილი.