"არ მივიღებთ “თეთრი ხმაურის“ და კლუბ “ბასიანში“ დაწერილ კანონპროექტს"- რა რეაქცია მოჰყვა მოქალაქეთა პროტესტს უმრავლესობაში

პოლიტიკა - 20:04, 25 Jan, 2018

1586

უმრავლესობის დეპუტატები რუსთაველზე მიმდინარე აქციას და ქვეყანაში არსებულ ნარკოპოლიტიკას გამოეხმაურნენ.
ანრი ოხანაშვილი ამბობს, რომ ადამიანურად ესმის გიორგი გიორგანაშვილის გულშემატკივრების, მაგრამ, მსჯავრდებულის პოზიციის დაცვა სახელმწიფო ინსტიტუტების დისკრედიტაციის ხარჯზე არ უნდა მოხდეს .
"ხელისუფლებას, რომლის მმართველობის პერიოდში ნარკოტიკის მხოლოდ მოხმარებისთვის პატიმარი არ არსებობს, ეუბნებიან, რომ ახორციელებს რეპრესიულ ნარკოპოლიტიკას.

არ შეიძლება რამდენიმე წლის წინანდელი პოლიცია, სასამართლო და პროკურატურა და დღევანდელი შევადაროთ ერთმანეთს. საზოგადოება ხედავს იმ მნიშვნელოვან წინგადადგმულ ნაბიჯებს, რაც ამ უწყებებში 2012 წლიდან ხორციელდება.
ჰუმანური სისხლის სამართლის პოლიტიკა, რაც ჯერ კიდევ რეფორმის პროცესშია, სწორედ ჩვენი ხელისუფლების დამსახურებაა. ჩემი თხოვნაა, ემოციების გარეშე მივუდგეთ ასეთ საკითხებს და ერთად ვიმუშაოთ რეფორმებზე“, - აღნიშნა ანრი ოხანაშვილმა.

რაც შეეხება ვანო ზარდიაშვილს, მისი პოზიცია ასეთია: "სახელმწიფო დაუნდობელი იქნება ყველას მიმართ, ვინც ნარკოტიკული საშუალებებით სხვის შვილებს წამლავს და ჰგონია, რომ 600 ადამიანის მოსახმარი ნარკოტიკი ჯიბეში უნდა ედოს".
დეპუტატის თქმით, “ქართული სახელმწიფო “თეთრი ხმაურის“ შატაჟს ვერ დაექვემდებარება“.
"ნარკოპოლიტიკის ლიბერალიზაციის თაობაზე ჩვენ ახალ კანონპროექტს მივიღებთ, რომელიც მთავრობაში მუშავდება და არა “თეთრი ხმაურის“ და კლუბ “ბასიანში“ დაწერილ კანონპროექტს, რომელიც ნარკოტიკების გავრცელებასა და გასაღებისთვის ძალიან მცირე სასჯელებს გულისხმობს"- აღნიშნავს დეპუტატი.

თბილისში პარლამენტის შენობასთან საპროტესტო აქცია მიმდინარეობს. სამოქალაქო სექტორის წარმომადგენლები ნარკოპოლიტიკის ლიბერალიზაციისა და მსახიობ გიორგი გიორგანაშვილის გათავისუფლების მოთხოვნით შეიკრიბნენ. ისინი მოძრაობა "თეთრი ხმაურის" აქტივისტის, ბექა წიქარიშვილის გათავისუფლებასაც ითხოვენ, რომელსაც საქალაქო სასამართლომ 14 დღიანი პატიმრობა შეუფარდა.

პარლამენტთან შეკრებილები ხელისუფლებას ნარკოპოლიტიკის შესახებ კანონპროექტის დაჩქარებული წესით განხილვისკენ მოუწოდებენ.