ოკუპირებული ცხინვალის რეგიონის ე.წ საბაჟო სამსახურმა ე.წ საზღვარზე სოფელ მოსაბრუნთან („რაზდახანი“) ახალი საბაჟო პუნქტი გახსნა. მებაჟეებთან ერთად ე.წ საზღვარზე ტვირთს ვეტერინარული და ფიტოსანიტარიის სამსახურის წარმომადგენლებიც შეამოწმებენ. ოკუპირებული რეგიონის მედიის ცნობით ამის შესახებ გადაწყვეტილების მიღება ე.წ ხელისუფლების გაფართოებულ სხდომაზე მოხდა.

ე.წ საბაჟო კომიტეტის ხელმძღვანელის მოადგილის აკეკსეი კუდუხოვის თქმით საბაჟო პუნქტი 17 იანვრიდან ფუნქციონირებს და მთლიანობაში იქ 18 ადამიანი 4 ცვლაში მუშაობს.

როგორც ადგილობრივი მედია წერს, პირადი მოხამრების მიზნით მოქალაქეს ე.წ საბაჟო პუნქტზე 50 კგ-მდე პროდუქტის უფასოდ გადატანის უფლება აქვს, სავაჭრო მიზნებით კი ნებადართულია 3 ტონამდე ტვირთის გადატანა, შესაბამისი გადასახადის გადახდის შემდეგ.

ახალგორის რაიონში საქართველოს კონტროლირებადი ტერიტორიიდან იკრძალება მეცხოველეობის პროდუქტების შეტანა, მათ შორის, შინაური ცხოველების შეყვანა. ამის გაკონტროლების მიზნით, მებაჟეებთან ერთად, საბაჟო პუნქტზე „იუგოსელხოზნადზორის“ თანამშრომლებიც იქნებიან.