აღსრულების ეროვნული ბიურო სტუდენტებთან თანამშრომლობას აღრმავებს

პოლიტიკა - 14:40, 25 Jan, 2018

1006

აღსრულების ეროვნული ბიურო და საქართველოს ტექნიკური უნივერსიტეტი პრაქტიკული თანამშრომლობის ახალ ეტაპს იწყებენ. უმაღლეს სასწავლებელსა და იუსტიციის სამინისტროს სსიპ აღსრულების ეროვნულ ბიუროს შორის ურთიერთთანამშრომლობის მემორანდუმი გაფორმდა.

შეთანხმების მიზანია, უნივერსიტეტსა და ბიუროს შორის თანამშრომლობის გაღრმავება, ერთობლივი ღონისძიებების განხორციელება, სტუდენტების პროფესიული განვითარების ხელშეწყობა და კვალიფიციური კადრების მომზადება.

მემორანდუმი ითვალისწინებს ფულად-საკრედიტო ვალდებულებების შესახებ ცნობიერების ამაღლებას და ამგვარი ვალდებულებების წარმოშობისა და შესაძლო შედეგების შესახებ მათ ინფორმირებას. მემორანდუმის ფარგლებში, აღსრულების ეროვნული ბიუროს თანამშრომლები უნივერსიტეტის სტუდენტებისთვის ჩაატარებენ ლექცია-სემინარებს ქართული სააღსრულებო სისტემისა და ბიუროს სერვისების შესახებ.

აღსრულების ეროვნული ბიურო, თავის მხრივ, მზადაა, მონაწილეობა მიიღოს სხვადასხვა დონის საგანმანათლებლო ღონისძიებების შემუშავებასა და განხორციელებაში, სემინარების, კონფერენციების დაგეგმვასა და განხორციელებაში; უნივერსიტეტის წარმატებული სტუდენტები კი სააღსრულებო სამართლის ზოგად კურსს აღსრულების ეროვნულ ბიუროში გაივლიან.

მემორანდუმს ხელი აღსრულების ეროვნული ბიუროს თავმჯდომარე იოსებ ბაღათურიამ და საქართველოს ტექნიკური უნივერსიტეტის რექტორმა, არჩილ ფრანგიშვილმა მოაწერეს.