პოლონეთში, სამუშაო ვიზიტით მყოფი, რუსთავის მერი ირაკლი ტაბაღუა, ბიზნესსექტორისა და თვითმმართველობის წარმომადგენლებთან ერთად, ლიუბლინის ვიცემერს, არტურ შიმჩიკს შეხვდა.

შეხვედრაზე მხარეებმა მათი ქალაქების წინაშე მდგარი გამოწვევების, პრიორიტეტებისა და შესაძლებლობების შესახებ ისაუბრეს. ასევე საუბარი შეეხო იმ საერთო ინტერესთა სფეროებს , რომლებიც შესაძლოა ქონდეთ რუსთავსა და ლიუბლინს. არტურ შიმჩიკი მიესალმება რუსთავის მერიის დელეგაციის ვიზიტს ქალაქ ლიუბლინში და თვლის, რომ მსგავსი ვიზიტები საფუძველს ჩაუყრის სამომავალო წარმატებულ ორმხრივ თანამშრომლობას და სასარგებლო გადაწყვეტილებების მიღებას.

რუსთავის მუნიციპალიტეტის დელეგაცია პოლონეთში 21 იანვარს გაემგზავრა. ვიზიტის ფარგლებში ქალაქებში ლოძში, სტალოვა ვოლასა და ლიუბლინში შეხვედრები გაიმართება.
რუსთავის თვითმმართველობისა და ბიზნეს სექტორის წარმომადგენლები პოლონეთში არსებულ ინოვაციურ სერვისებს, მათი დანერგვის სპეციფიკას, ასევე, განხორციელებულ და მიმდინარე რევიტალიზაციის პროცესს გაეცნობიან, რაც 90-იანი წლების ეკონომიკური კოლაფსის შემდეგ, ყოფილი ინდუსტრიული ქალაქების განვითარებას ითვალისწინებს.

რუსთავის მუნიციპალიტეტის მერია ჩართულია პროექტში - „სამთავრობო სერვისლაბის და UNDP-ის პარტნიორობის ექსპერიმენტული მოდელი მმართველობაში განვითარების ახალი სფეროების აღმოჩენისთვის“.

პროექტს გაეროს განვითარების პროგრამა (UNDP) და საქართველოს იუსტიციის სამინისტროს სერვისების განვითარების სააგენტო ახორციელებენ. რუსთავის მერი პოლონეთში ვიზიტს 26 იანვარს დაასრულებს.