"როდესაც თავშესაფრის მაძიებელთა რიცხვი იზრდება, ეს ქვეყნის მძიმე ეკონომიკურ და სოციალურ ვითარებაზე მიანიშნებს"

"როდესაც თავშესაფრის მაძიებელთა რიცხვი იზრდება, ეს ქვეყნის მძიმე ეკონომიკურ და სოციალურ ვითარებაზე მიანიშნებს" - ოპოზიცია

პოლიტიკა - 15:55, 23 Jan, 2018

2835

ვიზალიბერალიზაციასთან დაკავშირებით საქართველოსთან მიმართებაში შეჩერების მექანიზმის შესაძლო ამოქმედებას ოპოზიციიური პარტიის წარმომადგენლები ეხმაურებიან.

თუმცა საპარლამენტო ოპოზიციაში ამბობენ, როდესაც თავშესაფრის მაძიებელთა რიცხვი იზრდება, ეს ქვეყნის მძიმე ეკონომიკურ და სოციალურ ვითარებაზე მიანიშნებს.

„შეჩერების მექანიზმი მგონია, რომ დღესაც არ დგას დღის წესრიგში, მაგრამ თუ დადგება საქართველოსთან მიმართებით, ეს პირდაპირ ნიშნავს, რომ ქვეყანაში ეკონომიკური და სოციალური ვითარება არის გაუარესებული. ეს ნიშნავს, რომ ქვეყნიდან მიგრანტთა რაოდენობა იზრდება. ხელისუფლებას თუ უნდა, რომ საქართველოს მოსახლეობა შეინარჩუნოს საქართველოში, მაშინ მას შესაბამისი სოციალური და ეკონომიკური პირობები უნდა შეუქმნას,“ - განაცხადა „ნაციონალური მოძრაობის“ წევრმა, ნინო კალანდაძემ.

„ევროპული საქართველოს" შეფასებით, იმისთვის, რომ საქართველოს მოქალაქეებმა თავისი ქვეყანა არ დატოვონ, ხელისუფლებამ ეკონომიკა უნდა გააძლიეროს და სამუშაო ადგილები შექმნას.

„არცერთ ჩვენს მოქალაქეს არ სიამოვნებს აიბარგოს თავისი ქვეყნიდან და თავშესაფარი ან სამუშაო ადგილი ეძებოს სადმე სხვაგან, მათ შორის ევროპაში. ამას ჩვენს მოქალაქეებს აიძულებს ის საყოველთაო გაჭირვება და სიღარიბე, რომელიც ქვეყანაშია და თუ „ქართულ ოცნებას“ უნდა, რომ ეს ნაკადი შეაკავოს და ჩვენი მოქალაქეები ქვეყანაში ბრუნდებოდნენ, მაშინ ამ ქვეყანაში ეკონომიკა უნდა იზრდებოდეს, სამუშაო ადგილები უნდა იქმნებოდეს, ლარი მყარი უნდა იყოს,“ - განაცხადა „ევროპული საქართველოს“ წევრმა, ზურაბ ჭიაბერაშვილმა.