ატენის ქუჩაზე 27-სართულიანი კორპუსის მშენებლობის ნებართვის გაცემასთან დაკავშირებით დედაქალაქის მერი კახა კალაძე დამატებით განმარტებას აკეთებს:

“გულწრფელად გეტყვით, დღეს რომ ნულიდან იწყებოდეს ყველაფერი, ნებართვას არ გავცემდი. ამ კონკრეტულ ადგილზე 12 თუ 14 სართული უკვე აშენებულია. მთელი რიგი სასამართლო პროცესებია გამართული. სასამართლოს გადაწყვეტილებით, კოეფიციენტი, რომელიც მიღებული ჰქონდა 2011 წელს ამ სამშენებლო კომპანიას, დარჩა ძალაში. შესაბამისად, არანაირი შესაძლებლობა, არანაირი საბაბი არ მქონდა იმის, რომ უარი მეთქვა და არ გამეცა მშენებლობის ნებართვა. მე ვემორჩილები კანონს და ვმოქმედებთ კანონის შესაბამისად, თუ მოხდება გასაჩივრება სასამართლოში, ეს იქ მცხოვრებ ადამიანებზეა დამოკიდებული. ეს კონკრეტული ქეისი თავიდან რომ იხსნებოდეს, ჩვენ გვაქვს ჩვენი მოსაზრება და ამ კონკრეტულ ადგილზე მშენებლობის ნებართვას არ გავცემდით, ამ კონკრეტული კოეფიციენტით.

ზონალური საბჭო შეიკრიბა, იმსჯელეს. ზონალური საბჭოს თითოეულმა წევრმა დადო დასკვნა, თუ რატომ არ იყო პრობლემა 8 კოეფიციენტი. შესაბამისად, მაშინდელმა მერმაც გამოსცა ბრძანება, რომ პროექტი გაგრძელებულიყო. ესეც გასაჩივრდა და სააპელაციო სასამართლომ გააბათილა ეს გასაჩივრება. მე ერთადერთი, რაც მქონდა დარჩენილი, იყო ის, რომ გამეცა ნებართვა. გარკვეული ტექნიკური ხასიათის ხარვეზები გამოვავლინეთ, რაც იყო გასწორებული და შესაბამისად გააგრძელეს მშენებლობა”, – განაცხადა კახა კალაძემ.

შეგახსენებთ, რომ ატენის ქუჩაზე 27-სართულიანი კორპუსის მშენებლობის ნებართვა არ გასცა გასულ წელს სასამართლომ, თუმცა აღნიშნული ნებართვა უგულვებელჰყოფილი იქნა მერიის მიერ და 2018 წლის იანვარში მშენებლობის გაგრძელების ნებართვა გაიცა.