შინაგან საქმეთა სამინისტროს ახალი, ადამიანის უფლებათა დაცვის დეპარტამენტის პრეზენტაციაზე, მინისტრმა გიორგი გახარიამ განაცხადა, რომ კრიმინალთან ბრძოლაში უწყების მიღწევებს არ ექნება ფასი, თუ ადამიანის უფლებების დაცვის სტანდარტი არ იქნება შენარჩუნებული. მინისტრმა ახალი დეპარტამენტის მიზნებზე ისაუბრა:

”ჩვენ გვესმის, რომ დღევანდელ პირობებში ადამიანის უფლებების დაცვის გარეშე, რაც არ უნდა გავაკეთოთ კრიმინალთან ბრძოლაში ან შინაგან საქმეთა სამინისტროს ფორმირებაში, ამას ყველაფერს ფასი არ ექნება. ეს უბრალოდ არ გამოჩნდება. ამიტომ იყო მიღებული გადაწყვეტილება, პირველი ნაბიჯი სისტემის რეფორმირების დაგვეწყო სწორედ ამ დეპარტამენტის შექმნიდან.

დეპარტამენტს აქვს კონკრეტული მიზნები და ამოცანები. მოგეხსენებათ, რომ სამწუხაროდ ჩვენთან, ქვეყანაში, ჯერ კიდევ გამოწვევად რჩება ქალთა მიმართ ძალადობა, ოჯახში ძალადობა, არასრულწლოვნების მიმართ ან მათ მიერ ჩადენილი დანაშაული და ყველა სახის დისკრიმინაციულ საფუძველზე ჩადენილი დანაშაული. რა თქმა უნდა, აქ არის გარკვეული კულტურული პრობლემები, როდესაც დაზარალებულს უჭირს საგამოძიებო ორგანოებთან და სამართალდამცავებთან თანამშრომლობა და განსაკუთრებით დიდ მნიშვნელობას ამ ჭრილში იძენს სამართალდამცავების კომპეტენცია, მათი ცოდნა და გამოძიების ხარისხი.

სწორედ ამ ამოცანების გადასაჭრელად არის შექმნილი ეს დეპარტამენტი, სწორედ ეს იქნება მისი ძირითადი გამოწვევა. სწორედ ამ მსგავსი პრობლემების გადასაწყვეტად იქმნება ეს დეპარტამენტი,” - განაცხადა გიორგი გახარიამ.