"თურმე უკანასკნელად ვუყურებდი მის ულამაზეს ღიმილს" - ვინ არის აშშ-ში მოკლული ქართველი ექიმი

სოც.მედია - 10:55, 22 Jan, 2018

11319

აშშ-ში 31 წლის ქართველი ექიმი დავით კანდელაკი მოკლეს. ქალაქ ლუისვილის პოლიცია ორი ადამიანის მკვლელობაში ეჭვმიტანილს ეძებს.

შემთხვევა ლუისვილის ერთერთ საცხოვრებელს სახლში მოხდა, სადაც პოლიციამ ორი მამაკაცის ცხედარი აღმოაჩინა. მეორე გარდაცვლილი 31 წლის ჯოშუა რეისია, რომელსაც აღნიშნული სახლი ეკუთვნოდა.

მოკლულთან დაკავშრებით „ფეისბუკზე“ წერს ქუთაისელი მწერალი და ჟურნალისტი ნანული ცხვედიანი.

„ამერიკის შეერთებული შტატების პატარა ქალაქში, კიდევ ერთ ამერიკელ ახალგაზრდასთან ერთად, ტყვიით მოკლული იპოვეს 31 წლის ქართველი ექიმი დავით კანდელაკი. პოლიცია მუშაობს გაურკვეველ გარემოებაში მომხდარი მკვლელობის გასახსნელად.

ეს - ცივი, ოფიციალური ინფორმაცია.

ჩვენთვის კი...მოულოდნელი, თავზარდამცემი ელდა იმისა, რომ დაიღუპა ჩვენი ულამაზესი, უნიჭიერესი, უკეთილშობილესი, სიცოცხლით სავსე დათო კანდელაკი - დიდი კარიერის საფეხურზე შემდგარი ახალგაზრდა ექიმი, ტყუპი ქალ-ვაჟის მამა, მშვენიერი ნატაშას მეუღლე, საუკეთესო შვილი, ძმა, მეგობარი, ადამიანი, ქუთაისზე შეყვარებული ახალგაზრდა კაცი, რომელმაც მეუღლესაც შეაყვარა თავისი მშობლიური ქალაქი, ქართული ტრადიციები, ენა.

დათომ ქუთაისის სერგეი მესხის სახელობის ჟურნალისტიკის კერძო სკოლა-ლიცეუმი დაამთავრა. ყოველნაირად გამორჩეული, ბრწყინვალე მოსწავლე იყო და, როგორც მის მასწავლებელსა და ლიცეუმის დირექტორს, მეგონა, მალე ჟურნალისტიკაში, ან პოლიტიკაში ხმამაღლა იჟღერებდა მისი სახელი, მან კი სრულიად სხვა არჩევანი გააკეთა: ამერიკაში წავიდა და თავდადებული შრომით, განსაკუთრებული ცოდნისწადილით უმაღლესი სამედიცინო განათლება მიიღო. სულ ახლახან ლიცენზიაც დაიმსახურა და წინ დიდი პერსპექტივა ჰქონდა. დავით კანდელაკი თავისი ქვეყნის სახე იყო შორეულ ქვეყანაში: კულტურული, განათლებული, კეთილშობილი, ყველასგან პატივსაცემი და დასაფასებელი. მისი ფეისბუკის გვერდი სავსეა იქაური მეგობრების მწუხარე გამოსათხოვარი სიტყვებით.
სულ ახლახან ცოლ-შვილთან ერთად უკანასკნელად იმყოფებოდა ქუთაისში დათო. სამსახურში მეწვია , ბევრი მეფერა, მითხრა, რომ ლიცეუმში მიღებული უნარჩვევები ცხოვრებაში მრავალჯერ დაეხმარა. ბოლოს მოკრძალებით გადმომცა პროფესიული საჩუქარი - პაწია, ძალზე კომფორტული დიქტოფონი...

რას ვიფიქრებდი, რომ ეს დათუნას გამოსათხოვარი ჟესტი იყო...
თურმე უკანასკნელად ვუყურებდი მის ულამაზეს ღიმილს!

ბევრი ვიტირე, მაგრამ რას შველის ცრემლი ამ ტრაგედიას!..“ - წერს ცხვედიანი.

კანდელაკს მეუღლე და ტყუპი ქალ-ვაჟი დარჩა.