მედიაორგანიზაციები პარლამენტს „მაუწყებლის შესახებ კანონზე“ ფართო მსჯელობისკენ მოუწოდებენ

პოლიტიკა - 11:50, 18 Jan, 2018

1214

„მაუწყებლის შესახებ კანონი“ - მედია ორგანიზაციები უმაღლეს საკანონმდებლო ორგანოს პრეზიდენტის ვეტოს დაძლევამდე აღნიშნული საკითხის შესახებ ფართო მსჯელობისკენ მოუწოდებენ.

მედია ორგანიზაციებმა ერთობლივი მიმართვა გაავრცელეს, სადაც აღნიშნულია, რომ პრეზიდენტის შენიშვნები კანონთან დაკავშირებით მნიშვნელოვანია და მისი გათვალისწინება აუცილებლად უნდა მოხდეს:

„ეს კანონპროექტი შეიცავს ძალიან დიდ საფრთხეებს. შესაბამისად, ეს ვეტო შესაძლებელია გამოყენებულ იქნეს როგორც შანსი, რომ დაბრუნდეს ეს საკითხი პარლამენტში, განიხილონ და არ იქნას გამოყენებული ძალისხმევა, რომ დაძლიონ ეს ვეტო,“ - განაცხადა „რუსთავი2“-ის იურისტმა თამთა მურადაშვილმა.

კერძო მაუწყებლების წარმომადგენლები მაუწყებლის შესახებ კანონის ამოქმედების შემთხვევაში,მოსალოდნელ საფრთხეებზე ამახვილებენ ყურადღებას:

„შენიშვნები გვაქვს ყველა მხარეს და იმედი გვაქვს, რომ ეს მიმართვა, პარლამენტის მიერ არ იქნება უგულებელყოფილი და ისინი აუცილებლად გაითვალისწინებენ, მათ შორის პრეზიდენტის შენიშვნებს. იმიტომ, რომ რეალურად ეს საკანონმდებლო ცვლილება არაფერს კარგს არ მოუტანს არც სარეკლამო ბაზარს, არც კომერციულ ტელევიზიებს და არც საზოგადოებრივ მაუწყებელს,“ - აცხადებს "TV პირველის“ კომერციული დირექტორი ნანა აბურჯანიძე.

“მივესალმებით საქართველოს პრეზიდენტის გადაწყვეტილებას, რომელმაც ვეტო დაადო “მაუწყებლობის შესახებ“ კანონში შესატან ცვლილებებს. მოგიწოდებთ, პრეზიდენტის ვეტო გამოიყენოთ, როგორც შანსი, კიდევ ერთხელ დაუბრუნდეთ ამ საკითხს და უფრო გულდასმით შეისწავლოთ ის საფრთხეები, რასაც მედიაგარემოს “მაუწყებლობის შესახებ“ კანონის სადავო რედაქცია უქმნის. გთხოვთ, გაიზაიროთ პრეზიდენტის, პარლამენტის დარგობრივი ეკონომიკის კომიტეტის, სამოქალაქო სექტორის, მედიაორგანიზაციების აბსოლუტური უმრავლესობის შენიშვნები და არ დაძლიოთ ვეტო. ქვეყანაში, სადაც კომერციული რეკლამის ბაზარი ყოველწლიურად იკლებს, ხოლო საზოგადოებრივი მაუწყებლის საბიუჯეტო გარანტირებული დაფინანსება ყოველწლიურად არაერთი მილიონით იმატებს, სადაც საზოგადოებრივი მაუწყებლის გარანტირებული შემოსავალი მუდმივად აჭარბებს სარეკლამო ბაზრის ნახევარს, საზოგადოებრივი მაუწყებლისთვის სარეკლამო და სასპონსორო შესაძლებლობების მნიშვნელოვნად გაზრდა საფრთხეს უქმნის დამოუკიდებელი მედიის ფინანსურ მდგრადობას. მეორეს მხრივ კი, ეჭვქვეშ აყენებს თავად საზოგადოებრივი მაუწყებლის იდეას, რაც სხვა კომპონენტებთან ერთად კომერციული გავლენისგან თავისუფლებას გულისხმობს. ჩვენი საზოგადოება იმსახურებს ძლიერ, გავლენებისგან თავისუფალ საზოგადოებრივ მაუწყებელს. ამავე დროს იმსახურებს ძლიერ, დამოუკიდებელ კერძო მედიას, რაც ფინანსური მდგრადობის გარეშე გამორიცხულია. ვფიქრობთ კანონმდებლებმა უნდა უზრუნველყონ ორივე სიკეთის დაცვა. მოგიწოდებთ, გადაწყვეტილების მიღებამდე პარლამენტის თავმჯდომარემ და უმრავლესობის ფართო შემადგენლობამ, გამართოთ შეხვედრა დამოუკიდებელი მედიის წარმომადგენლებთან და მოისმინოთ ჩვენი არგუმენტები“, - ნათქვამია მიმართვაში.

მიმართვა ღიაა ხელმოწერის მსურველი მედიაორგანიზაციებისთვის.

მას ხელს აწერენ:

1. ტელეკომპანია იმედი

2. ტელეკომპანია რუსთავი 2

3. ტვ პალიტრანიუსი

4. რადიო პალიტრა

5. ტვ პირველი

6. BMG ბიზნესმედია ჯორჯია

7. ტელეკომპანია კავკასია

8. ტელეკომპანია იბერია

9. ტელეკომპანია ობიექტივი

10. ტელეკომპანია სტარვიზია