ჯანდაცვის სამინისტრო კატეგორიულად უარყოფს გავრცელებულ ინფორმაციას იმის შესახებ, რომ ქვეყანაში საფრთხის შემცველი ვაქცინაა შემოტანილი. ამის შესახებ განცხადება დაავადებათა კონტროლის და საზოგადოებრივი ჯანმრთელობის ეროვნული ცენტრის გენერალური დირექტორმა ამირან გამყრელიძემ დღეს საგანგებო ბრიფინგზე გააკეთა.

„პუბლიკაციაში გამოქვეყნებული ინფორმაცია რეალობას არ შეესაბამება და ამაზე პასუხი რამდენჯერმე აქვს გაცემული დაავადებათა ეროვნულ ცენტრს. მე არ მინდა ვიფიქრო, რომ გამიზნულად ხდება ქვეყანაში უმნიშვნელოვანესი საზოგადეოებრივი ჯანდაცვითი ინტერვენციის დისკრედიტაცია, რაც დაკავშირებულია იმუნიზაციასა და ვაქცინაციასთან. არ არის ნახსენები რომ ეს არის ცოფის ვაქცინა და არა ის გეგმიური ვაქცინაცია, რომელიც ბავშვებს უტარდება. 2015 წლიდან ქვეყანაში ცოფის არცერთი შემთხვევა არ არის და სწორედ ეს გახლავთდამსახურება იმუნიზაციის პროცესის გამართვისა.“- განაცხადა ამირან გამყრელიძემ. მან აუდიტის სამსახურს მოუწოდა, რომ კიდევ ერთხელ გაიმართოს ჯანდაცვის წარმომადგენლებთან შეხვედრა.

შეგახსენებთ სახელმწიფო აუდიტის სამსახურის ინფორმაციით, ჩატარებული აუდიტით გამოვლინდა, რომ შეძენილია პრეპარატი, რომელმაც კანონმდებლობით დადგენილი წესით რეგისტრაცია ვერ გაიარა და შესაბამისად, საქართველოს ბაზარზე დაშვების უფლება არ ჰქონდა.

„მიუხედავად ამისა, ბაზარზე დაშვების უფლება მოპოვებულია კომისიის გადაწყვეტილებით, რომლის თანახმად კომისიის მიერ ხარისხის დადასტურება ეფუძნება მინიმალურ სტანდარტებს”, – ნათქვამია აუდიტის სამსახურის 2018 წლის გეგმაში.

დოკუმენტის თანახმად, აუდიტის ჩატარების პერიოდია 2016-2017 წლები.